Reuters yanditse ko mu gihe inkuru z’ibihuha n’amatsinda ya barinda y’abakoresha Facebook yiganje muri Leta Zunze Ubumwe za Amerika, icengezamatwara rinyuzwa kuri WhatsApp ryabaye ikibazo cy’ingutu mu bindi bice by’Isi.
Muri Brésil, yateje ikibazo mu matora ya Perezida yo mu Ukwakira 2018, havugwa ko uburyo bw’amatora ari bubi, hakanasakazwa inkuru zitarizo ku bakandida.
Inyigo yakozwe yagaragaje ko mu mashusho 50 yasakajwe mu itsinda rivugirwamo ibijyanye na Politiki muri Brésil yerekana ko arenga ½ yarimo ubutumwa buyobya, amenshi atariyo cyangwa yatanzwe mu buryo bufifitse.
Icyemezo cyo kugabanya ingano y’ubutumwa bwoherezwa buvuye ahandi cyazamuwe bitewe n’ibitero n’ubwicanyi bwabereye mu Buhinde byahitanye abantu 25 bishingiye ku makuru y’ibihuha yasakajwe avuga ku ishimutwa ry’abana.
WhatsApp ntiyagaragaje niba hari igabanuka ryabayeho mu makuru y’ibihuha asakazwa binyuze mu kugabanya umubare w’ubutumwa bwoherezwa buvuye ahandi.
Urugamba rwo kurwanya amakuru y’ibihuha binyuzwa kuri WhatsApp rurimo imbogamizi ugereranyije na Facebook bitewe n’imikorere yarwo kuko abarukoresha bahanahana ubutumwa mu buryo bwibanga bugoye gutahura.
WhatsApp yashinzwe mu 2009, igurwa na Facebook mu 2014. Imibare y’uru rubuga ruhuza abantu bagasabana, mu ntangiriro za 2018 rwakoreshwaga n’abarenga miliyari 1,5, bahererekanyaga ubutumwa miliyari 65 ku munsi.
Nyuma y’iminsi 20 muri Repubulika ya Demokarasi ya Congo habaye amatora y’Umukuru w’Igihugu, amatora Komisiyo y’igihugu yatangaje ko uwayatsinze ari Felix Antoine Tshilombo Tshisekedi, ubu noneho Urukiko rubifitiye Ububasha rwemeje burundu ko ari we wayatsinze, kandi ko ari we Perezida wa RDC.
Umwe mu bakandida batavuga rumwe n’ubutegetsi Martin Fayulu yari yaratanze ikirego mu Rukiko Rurinda Iremezo ry’Itegeko Nshinga avuga ko yibwe amajwi kandi ngo nyamara ari we watsinze amatora.
Inama idasanzwe y’Umuryango wa Afurika Yunze Ubumwe yafashe imyanzuro ishimangira ibyasabwe n’ibihugu by’Uburengerazuba bw’Isi, hamwe na Kiliziya Gatolika byifuzaga ko intsinzi ihabwa Fayulu cyangwa se amatora agasubirwamo.
Minisitiri w’Itangazamakuru wa RDC Lambert Mende Omalanga , akaba n’Umuvugizi wa Leta, yavuze ko batazagendera ku gitutu cy’amahanga, ko ahubwo Congo nk’igihugu cyigenga izagendera ku bushake n’amahitamo by’abaturage bayo.
Birangiye, Urukiko rurinda iremezo ry’itegeko Nshinga rufashe umwanzuro wo gutesha agaciro ikirego cy’Umukandida Martin Fayulu, runemeza ko intsinzi y’Umukuru w’Igihugu cya Repubuliaka ya Demokarasi ya Congo ari iya Felix Tshisekedi.
Felix Antoine Tshisekedi Tshilomba w’imyaka 55 asimbuye Joseph Kabila. Kurahirira kuzayobora igihugu, bizaba ari inshuro ya mbere muri iki gihugu habayeho ihererekanyabubasha mu mahoro, kuva icyo gihugu cyabona ubwigenge kuwa 30 Kamena 1960.
Ubwo abacamanza bemezaga Tshisekedi ko ariwe Perezida
Byatangajwe ko umuntu wateguye igitero tariki ya 15 Mutarama 2019 kuri hoteli DusitD2 i Nairobi muri Kenya bikekwa ko yaba yaraherewe imyitozo muri Uganda.
Umuryango we watangaje ko iki cyihebe kizwi nka Ali Salim Gichunge alias Farouk, cyahawe amasomo atandukanye arimo n’ay’ubutagondwa.
Gichunge ni umwe mu byihebe byishwe nyuma y’aho abantu bagera kuri bane bavuye mu modoka bambaye imyenda irinda amasasu biteguye kugaba igitero, cyasize gihitanye 21 abandi benshi bagakomereka.
Ikinyamakuru The New Vision cyatangaje ko uyu mugabo yageze muri Uganda mu 2016, agenda yitabira kwiga amatwara akaze y’ubutagondwa mu bice bitandukanye bya Uganda.
Se wa Gichunge witwa Abdala Salim, asanzwe ari mu ngabo za Kenya,akaba afite ipeti rya Sergeant.
Kugeza ubu inzego z’umutekano zamaze guta muri yombi uyu mugabo n’umugore we, Sakina Mariam, bakaba boherejwe mu Mujyi wa Isiolo uherereye mu Majyaruguru ya Kenya, aho barimo gukorwaho iperereza.
Inzego z’umutekano muri Uganda zirinze kugira amakuru zitanga kuri iki kibazo.
Gusa umwe mu bayobozi mu ngabo ukorana n’inzego z’umutekano za Kenya, yemeje aya makuru.
Ati “Nibyo, twakiriye amakuru y’ukuri ko iki cyihebe cyaje hano muri Uganda aho cyigishirijwe aya matwara, turimo gukora iperereza kandi mu gihe cya vuba tuzatanga amakuru arambuye.”
Hari amakuru ko umwe mu bayobozi mu nzego z’umutekano muri Uganda, yamaze kohereza impuguke mu gace ka Busia kugira ngo zishake amakuru ajyanye n’iyi myitozo Gichunge yahaherewe.
Umutwe w’iterabwoba wa Al-Shabaab, ni wo wigambye kugaba iki gitero.
Kubirebana no gufasha kubijyanye no kubona insimburangingo n’ibindi,uyu muryango uvugako ari kimwe mubizibandwaho ubwo amikoro azaba abonetse, gusa kubera ibibazo bitandukanye bikigaragara mu miryango y’abasigajwe inyuma n’amateka,hatangijwe ubuvugizi kubijyanye n’abana bafite ubumuga baba baraheze mu rugo, bitewe n’uko ababyeyi babo baba babuze ubushobozi bwo kubitaho nko kubabonera ibikoresho bibafasha kugera ku ishuli, ndetse no kubona insimburangingo.
Mu igenzura ryakorewe mu turere twa Kicukiro ,Kamonyi na gsabo, uyu muryango uvuga ko wahasanze abana benshi biganjemo abafite ubumuga bwo mu mutwe baheze mu rugo ntibahabwe amahirwe yabafasha guhindura ubuzima.
Mu byo uyu muryango uteganya harimo gukomeza gukora ubuvugizi ndetse no gutangiza undi muryango uzajya ukurikirana ibibazo abasigajwe inyuma n’amateka bafite, kubasabira uturere aho bajya bakorera ndetse no gufashwa kwinjizwa muri gahunda zibafasha kugira imibereho cyane ko nabo bagaragaza ko ari abantu bashoboye nk’abandi bose.
Mu bindi biteganijwe gukorwa murwego rw’ubuvugizi harimo gushishikariza icyatuma abana bafite ubumuga bajyanwa mu bigo bibitaho by’umwihariko nka Gatagara, kugirango babashe guhabwa ubumenyi ndetse no kumenyera kubana n’abandi ,cyane ko nyuma yo kumugara ubuzima buba bugikomeje.
Uyu muryango ushishikariza abahejejwinyuma n’amateka guharanira guhindura ubuzima bwabo bibumbira mu matsinda ,aho basabwa kwiha intego yo gukorera kumihigo kandi bakayesa nk’abandi , cyane ko iki cyizere gishingirwa ku kuba u Rwanda ari Igihugu gifite ubuyobozi bwiza.
Uyu muryango kandi cyane ko haba mubawutangije ndetse nabo ukorera ubuvugizi bose hamwe baturuka mu miryango y’abahejejw’inyuma n’amateka,basaba Leta guhera ku nzego z’ibanze kuzamura ,ko bakwiye kugirirwa icyizere no kubaba hafi aho bishoboka ,kuko bihaye intego yo gukoresha imbaraga zizana impinduka no kuba icyitegererezo,ndetse bakaba “ba ndebereho”.
Mukantabana dorocella utuye mu karere ka Kicukiro,Umurenge wa Masaka,Akagali ka Mbabe,Umudugudu wa Mbabe akaba ahagarariye koperative y’abafite ubumuga mu itsinda ryitwa Twikure mu bwigunge rigizwe n’abanyamuryango 28,aho bahanahana amafaranga bagamije kwikura mu bukene n’ubwigunge, yahamije ko amahugurwa bahawe yaziye igihe kandi ko agiye gusangiza bagenzi be ibyo bigishijwe no kubafasha kubishyira mu bikorwa , kuko bizabafasha guhindura imibereho yabo mu miryango.
Kuwa Kabiri w’iki Cyumweru nibwo abacamanza ba ICC batangaje ko ubushinjacyaha butabashije gutanga ibimenyetso bihagije ku bibazo bwabajijwe, bityo rutegeka ko Gbagbo na Charles Blé Goudé wahoze ayoboye urubyiruko rw’ishyaka Front Populaire Ivoirien barekurwa.
Jeune Afrique yatangaje ko Umuvugizi wa ICC yavuze ko Gbagbo na Goudé bakomeza kuba bacunzwe n’urwo rukiko mu gihe hagitegerejwe umwanzuro ku bujurire bw’ubushinjacyaha.
Se w’umuhanzi w’icyamamare muri Tanzania, Ali Kiba, yitabye Imana mu rukerera rwo kuri uyu wa kane azize uburwayi.
Ikinyamakuru cya Bongo 5 cyanditse ko Saleh Kiba yaguye mu bitaro bya Muhimbili mu Mujyi wa Dar es Salaam, aho yivurizaga.
Uyu mubyeyi wari ugeze mu za bukuru, ntabwo yakundaga kugaragara mu itangazamakuru nk’abandi babyeyi b’ibyamamare ndetse byatumye hari abavuga ko umuhungu we yamutereranye n’ubwo bitari byo.
Ali Kiba yigeze kuvuga ko nyina ari we wamufashije cyane mu muziki we kuruta se, ari nayo mpamvu atajya akunda kumuvugaho.
Ikiriyo kiri kubera mu rugo rwe Kariakoo, mu Mujyi wa Dar es Salaam.
Iri shami rya Polisi rishinzwe guhora ryongerera izi mbwa imyitozo izifasha kunganira abapolisi mu kazi kabo ka buri munsi ko gucunga umutekano.
Kuri uyu wa Gatatu tariki ya 16 Mutarama, hasojwe imyitozo y’ibyumweru bibiri y’imbwa 16 n’abatoza bazazikoresha mu kazi ka buri munsi yaberaga ku kicaro k’iri shami (canine brigde) giherereye mu kagari ka Masoro, umurenge wa Ndera mu karere ka Gasabo.
Ubuyobozi bw’iri shami buvuga ko buri mbwa iba ifite umupolisi nawe uba warahuguwe uko azajya ayiha amabwiriza, uko yayihana iramutse itumviye amabwiriza ayihaye, ndetse n’uko yayishimira igihe ishyize mu bikorwa amabwiriza yayihaye.
Canine brigde ivuga ko izi mbwa zimaze iminsi zitozwa zaguzwe mu gihugu cy’Ubuholandi, zikaba zirimo amoko atatu ariyo: Germany Shepherd, Beligian malinois na Butch Shepherd. Mu byo zatojwe harimo kumvira amabwiriza, gusaka imodoka, imizigo, n’ahandi hantu hakekwa ibishobora guhungabanya umutekano.
Umuyobozi wungirije wa Polisi y’Igihugu ushinzwe abakozi n’imiyoborere, DIGP Juvenal Marizamunda mu gusoza iyi myitozo yavuze ko izi mbwa zikora akazi kanini.
Yagize ati” Muzi neza ko umutekano w’abantu n’ibyabo ariwo shingiro ya byose, kuko iyo hari umutekano abantu barishyira bakizana n’iterambere rikihuta kandi ibyo bikaba inshingano cyane za Polisi. Hari ibyo rero Polisi idashobora gutahura n’amaso byihuse, izi mbwa rero zikora akazi gakomeye kunganira Polisi zitahura ibiyobyabwenge n’ibisasu kuko zihumurirwa nabyo, dore ko akenshi ababifite baba babihishe ahantu umuntu atapfa kubona”.
DIGP Marizamunda yavuze ko igipolisi cy’u Rwanda kirushaho kugenda kiyubaka mu rwego rwo gucunga no kubungabunga umutekano, aha yaboneyeho gusaba abatoza kujya bahora biyibutsa ubumenyi bahawe hagamijwe gukoresha neza izi mbwa zigatanga umusaruro.
Ramon Guerain, umutoza mukuru watoje aba bapolisi waturutse mu Buholande mu kigo cya the Police Dogs Centre Holland, yashimiye aba bapolisi imyitwarire myiza bagaragaje,ndetse n’umuhati mu masomo bahawe.
Polisi yo muri Ghana kuri uyu wa Kane, yatangaje ko umunyamakuru wacukumbuye ruswa n’amanyanga yakorerwaga mu mupira w’amaguru muri iki gihugu, yishwe arasiwe mu Mujyi wa Accra.
Uyu munyamakuru witwa Ahmed Husein, yari mu itsinda ryari riyobowe n’umunyamakuru Anas Aremeyaw Anas, rigakora ubucukumbuzi bwatumye abayobozi b’umupira w’amaguru begura n’abasifuzi barahagarikwa kubera ruswa.
Umuvugizi wa Polisi yabwiye AFP ko Ahmed yarashwe ku ijosi no mu gatuza n’abantu bitwaje intwaro bataramenyekana ubwo yerekezaga iwe mu ijoro ryo kuri uyu wa Gatatu.
Mu kwemeza aya makuru, Anas, yanditse kuri Twitter ati “Inkuru mbi ariko ntabwo tuzacecekeshwa. Ruhukira mu mahoro Ahmed”.
Abanyamakuru bo muri Ghana bamaganye iyicwa ry’uyu munyamakuru w’imyaka 34, wagize uruhare rukomeye mu kugaragaza ruswa yari mu mupira w’amaguru yatumye mu Ukwakira umwaka ushize FIFA, yahagaritse burundu uwari umuyobozi w’ishyirahamwe ry’umupira w’amaguru muri Ghana Kwesi Nyantakyi ndetse acibwa $500,000 nyuma yo kugaragazwa ku mashusho yakira ruswa.
Umukuru w’igihugu cy’Ubufaransa, Emmanuel Macron asaba ko hategurwa ibiganiro ku bibazo bitari bike bihanze igihugu cye, byatumye hanaba imyigaragambyo yamagana leta yamaze igihe kitari gito. Ni mu rwandiko yagejeje ku bafaransa ejo cyumweru.
Macron ateganya gutegura ibiganiro mu gihugu cyose mu byumweru umunani biri imbere.
Bimwe mu bibazo yiteguye bizibandwaho n’abafaransa ni byerekeye imisoro, ndetse n’ahandi hose byakenerwa ko ingengo y’imari ya leta ikwiye kwerekezwa, ibibazo by’ibidukikije hamwe n’ibirebana n’abimukira.
Ariko n’ubwo bimeze bitya bwose muri iri tegurwa ry’ibiganiro,ku bibazo byose, ikibazo cy’uburenganzira bw’abimukira basaba ubwenegihugu mu bufaransa ngo cyo nti kiri mubizashyirwa ku meza y’ibiganiro.
Ishirahamwe rigamije iterambere ry’ibihugu byo muri Afrika y’Amajyepfo (SADC),ryamaze gusaba ko amajwi y’ibyavuye mu matora ya perezida wa Repubulika iharanira demokarasi ya Kongo yasubirwamo.
Iri shyirahamwe ririmo n’igihugu cya Republika iharanira Demokrasi ya Kongo,ryasabye ko komisiyo y’amatora muri RDC yasubiramo ibyavuye mu matora kuko byamaganwe na benshi barimo na Martin Fayulu watsinzwe.
SADC irifuza ko hashyirwaho guverinoma ihuriweho na benshi ndetse CENI ikwiriye kongera kubara aya majwi yatumye byinshi mu bihugu bikomeye ku isi bicika ururondogoro.
Taliki ya 10Mutarama 2019,nibwo CENI yatangaje ko Félix Tshisekedi ariwe watsinze amatora yo kuba perezida wa RDC by’agateganyo aho yatowe n’amajwi 7 051 013 angana na 38,57% by’amajwi amaze kubarurwa. Martin Fayulu yaje ku mwanya wa kabiri na 6 366 732 bingana na 34,83%, imbere ya Emmanuel Ramazani Shadary watowe n’abaturage 4 357 359 bingana na 23,84%.
Perezida wa Zambia,Edgar Lungu,uyoboye uyu muryango wa SADC,yasabye abayobozi ba RDC guhura bakumvikana ndetse bagashyiraho guverinoma y’ubumwe.
