Tuniziya yatabaye abimukira 71 muri Mediterane

Abayobozi ba Tuniziya batangaje ejo kuwa kabiri ko batabaye abimukira 71 igihe ubwato barimo bwari bugiye kwibira ubwo bwavaga mu gihugu cya Libiya bugana mu Butaliyani.

Ibyo bikorwa byo gutabara byabaye ku mugoroba wo kuwa mbere hashize imisi ubundi bwato bwari bwafashe iyo nzira nyene yo mu nyanja ya Mediterane burohamye  n’abantu 80 bari muri bwo bakahasiga ubuzima.

Umuvugizi w’igisirikare cya Tuniziya kigenzura inkombe z’amazi, Houcem Eddine Jebali yavuze ako abo 71 bari muri ubwo bwato bose batabawe ubwato butararengerwa n’amazi  kandi  bose ni bazima.