imena news

Blog

  • Kongo zombi zirashaka kubaka iteme ‘rihuza Kinshasa na Brazzaville’

    Kongo zombi zirashaka kubaka iteme ‘rihuza Kinshasa na Brazzaville’

    Nkuko bitangazwa n’igitangazamakuru Bloomberg, abategetsi ba Repubulika ya Demokarasi ya Kongo n’aba Repubulika ya Kongo (Brazzaville) bashyize umukono ku masezerano yo kubaka iteme rihuza Kinshasa na Brazzaville.

    Byemezwa ko ari yo mirwa mikuru ibiri yegeranye cyane kurusha iyindi ku isi.

    Itandukanyijwe n’uruzi rwa Kongo, hakaba hari intera ya kilometero 8 hagati yayo.

    Amakuru avuga ko uburyo busanzwe bwifashishwa n’abaturutse ku mpande zombi, ari ubwato buto n’ubwato bwa moteri akenshi buba bushaje, cyangwa urugendo rwo mu ndege rumara iminota itanu ruba kabiri mu cyumweru.

    Kinshasa (hakurya y’uruzi Kongo) na Brazaville (hino) niyo mirwa mikuru yegeranye kurusha iyindi kw’isi.

    Igitangazamakuru Bloomberg cyatangaje ko umushinga wo kubaka iri teme rihuza imijyi yombi – Kinshasa na Brazzaville – bigereranywa ko uzatwara miliyoni 550 z’amadolari y’Amerika.

    Iki gitangazamakuru gisubiramo amagambo ya Jean-Jacques Bouya, minisitiri w’igenamigambi ry’imishinga yo mu kirere wa Repubulika ya Kongo, avuga ko iryo teme rizaba rifite uburebure bwa metero 1575.

  • Gusubukura CYAMUNARA k’umutungo utimukanwa i Butansinda/Nyanza

    Gusubukura CYAMUNARA k’umutungo utimukanwa i Butansinda/Nyanza

    Kanda hano usome itangazo ryo gusubukura cyamunara i Nyanza muburyo bwa pdf

  • USA:Abageni baguye mumpanuka y’indege bavuye muhango w’ubukwe bwabo

    USA:Abageni baguye mumpanuka y’indege bavuye muhango w’ubukwe bwabo

    Abategetsi bo muri Leta Zunze Ubumwe z’Amerika bavuga ko umugore n’umugabo we bari bakimara gukora ubukwe bapfiriye mu mpanuka y’indege ya kajugujugu ubwo bavaga mu muhango w’ubukwe bwabo ku wa gatandatu nijoro.

    Will Byler na Bailee Ackerman Byler bombi bigaga kuri Kaminuza ya Sam Houston State University. Ikinyamakuru cyandikwa n’abanyeshuri ni cyo cyatangaje iyi nkuru bwa mbere.

    Iyo mpanuka y’indege yabereye hafi y’ahitwa Uvalde, nko kuri kilometero 135 mu burengerazuba bwa San Antonio.

    Ku mbuga nkoranyambaga, abari batashye ubwo bukwe batangaje ubutumwa bwo kwihanganisha abasigaye bo mu miryango ya ba nyakwigendera.

    Umwe mu nshuti zabo zo kuri Facebook, yanditse ati:

    “Ndashavuye bitavugwa!”

    Yongeyeho ko n’umupilote wari utwaye iyo ndege na we yapfiriye muri iyo mpanuka.

    Ukuriye ishyirahamwe ry’abanyeshuri bo kuri kaminuza bigagaho, yasohoye itangazo kuri Facebook avuga ko ba nyakwigendera “bazahora bibukirwa ku mitima yabo yuje ubwuzu no kugira ishyaka kwabo”.

    Indi nshuti yabo nayo yanditse ubutumwa kuri Instagram igira iti:

    “Mfite amahoro kubera ko muvuye kuri iyi si mwuzuye ibyishimo n’urukundo. Mbega ukuntu ari byiza ukuntu mugiye gukora ukwezi kwa buki muri kumwe na Yezu”.

    Yongeyeho ati:

    “Ndishimye cyane kuba narashoboye kuba hamwe namwe mwese muri iyi minsi ya nyuma. Imitima yacu irakomeretse kuri ubu, ariko tuzi ko iri atari ryo herezo”.

    Bombi bari bamaze isaha imwe irenga gato basezeranye ubwo kajugujugu barimo yakoreraga impanuka mu rwuri rw’umuryango wa Byler ruri mu majyepfo ya Texas.

    Nkuko byatangajwe n’ikinyamakuru cy’abanyeshuri cyitwa the Houstonian, Will Byler yigaga mu ishami ry’ubuhinzi.

    Bailee Ackerman Byler we yigaga iyamamaza-buhinzi.

    Bombi bari bari mu mwaka wabo wa nyuma kuri iyo kaminuza.

    Nkuko byatangajwe n’urwego rw’igihugu ry’umutekano mu bwikorezi, indege barimo yakoze impanuka ni iyo mu bwoko bwa Bell 206B.

    Ibyasigaye by’iyo ndege byatoraguwe mu gitondo cyo ku cyumweru aho habereye impanuka. Polisi ikorera muri ako gace yavuze ko hapfuye abantu benshi, ariko ntiyatangaza amazina yabo.

    Kompanyi ikora ibyo gutegura ubukwe, ku wa mbere yasohoye itangazo ivuga ko yifatanyije “n’uyu muryango muri ibi byago”.

    Ku rubuga rwa Instagram, iyi kompanyi yatangaje ifoto y’ubukwe bwa banyakwigendera.

    Gerald Green Lawrence, wari utwaye iyo kajugujugu, na we yatangajwe ko ari umwe mu bapfuye.

    Umukobwa we yabwiye igitangazamakuru ABC ko yari yarabaye mu gisirikare cy’Amerika afite ipeti rya kapiteni ndetse akaba yaranarwanye mu ntambara ya Vietnam.

  • Perezida Trump yashakishije amajwi bwa nyuma

    Perezida Trump yashakishije amajwi bwa nyuma

    Perezida Donald Trump wa Leta Zunze Ubumwe z’Amerika yakoze igikorwa cya nyuma cyo gushakisha amajwi yo gushyigikira ishyaka ry’abarepubulikani akomokamo, habura umunsi umwe ngo amatora rusange – abonwa nka kamarampaka ku butegetsi bwe – atangire.

    Bwana Trump yagize ati:

    “Buri kintu cyose twagezeho kugeza ubu gishobora kuba cyaburizwamo ejo [ku wa kabiri]”.

    Aya matora rusange abaye harangiye kimwe cya kabiri cya manda ye y’imyaka ine, kandi ibizayavamo ni byo bizagena uburyo azategeka mu myaka ibiri iri imbere.

    Byitezwe ko yitabirwa ku kigero cyo hejuru.

    Imyanya 435 ni yo ihatanirwa mu nteko ishingamategeko n’imyanya 35 mu myanya 100 muri sena – inzego ebyiri zigize kongere y’Amerika. Hari no gutorwa ba guverineri muri leta 36 kuri 50 zigize Leta Zunze Ubumwe z’Amerika.

    Mu minsi ya vuba ishize, Perezida Trump yakajije imvugo ye ku bibazo bitandukanya Abanyamerika mu rwego rwo guha ingufu uruhande rwe.

    Barack Obama – witabiriye ibikorwa byo kwiyamamaza by’ishyaka ry’abademokarate – yavuze ko aya matora ari yo “azagena imiterere y’igihugu cyacu”.

    Uyu wahoze ari perezida w’Amerika, yatangaje ubutumwa ku rubuga nkoranyambaga rwa Twitter avuga ko aya matora “ashobora kuba ari yo y’ingenzi cyane abayeho mu bihe byacu”.

    Ni iki kiri guhatanirwa?

    Aya matora rusange ni yo azagena ishyaka rizaba riyoboye imitwe yombi – inteko ishingamategeko na sena – igize kongere y’Amerika ari na yo ishyiraho amategeko y’Amerika.

    Abarepubulikani nibaramuka bashoboye gukomeza kuyobora iyo mitwe yombi, bashobora gukomeza gushyira mu bikorwa gahunda zabo n’iza Perezida Trump.

    Ariko abademokarate nibaramuka bashoboye kwigarurira umutwe umwe cyangwa imitwe yombi ya kongere, bashobora kubangamira cyangwa bakaburizamo imigambi ya Bwana Trump.

    Amakusanyabitekerezo agaragaza ko abademokarate bashobora gutsindira imyanya 23 bacyeneye ngo bigarurire inteko ishingamategeko, ko ndetse bashobora no gutsindira indi myanya 15 cyangwa irenga.

    Ariko byitezwe ko abademokarate bashobora kuburaho imyanya ibiri bacyeneye kugira ngo bigarurire sena.

     

  • Urubanza rw’impunzi z’Abanyekongo zo mu nkambi ya Kiziba rwaburanishijwe

    Urubanza rw’impunzi z’Abanyekongo zo mu nkambi ya Kiziba rwaburanishijwe

    Itsinda ry’impunzi z’Abanyekongo ryagejejwe mu rukiko rwisumbuye rwa Korongi baregwa guteza imidugararo no gusuzugura amategeko y’igihugu cyazakiriye.

    Ibi birego bifitanye isano n’imvururu zabaye mu nkambi ya Kiziba no ku cyicaro cy’ishami ry’umuryango w’abibumbye ryita ku mpunzi, HCR, mu mujyi wa Karongi mu burengerazuba bw’u Rwanda.

    Izi mpunzi zinubiraga ifunguro ridahagije, zashyamiranye na polisi, abagera kuri 11 barahagwa abandi barakomereka.

    Urukiko rwa Karongi rwari rwazengurukijwe abapolisi benshi bitwaje intwaro, bigaragara ko habaye ikintu kidasanzwe.

    Abaregwa bakabakaba 60 binjiye mu rukiko bambaye imyenda y’iroza, babiri baziritse mu ipingu rimwe.

    Bose baregwa ibyaha bibiri: guteza imidugararo no gusuzugura amategeko y’igihugu cyabakiriye.

    Aba baregwa bagabanyijwe mu matsinda abiri: itsinda rya mbere rigizwe n’abantu 24 ariko babiri ntibagaragaye mu rukiko.

    Ubushinjacyaha bwavuze ko abatabonetse mu rukiko bwababuriye irengero, busaba ko bahamagazwa nk’abari ahantu hatazwi, bazakomeza kubura bakazaburanishwa badahari.

    Uku kubura kwa bamwe mu baregwa kwakuruye impaka ndende mu rukiko. Abunganira abaregwa basabye ibisobanuro ku buryo aba babuze, igihe baburiye n’icyo ubushinjacyaha bwakoze bumaze kubabura.

    Nta byinshi byasobanuwe n’ubushinjacyaha kuri iki kibazo uretse kuvuga ko batabonetse mu nkambi ubwo bari bagiye gutabwa muri yombi.

    Abanyamategeko Gilbert Ndayambaje na Sebaziga Sophonie bunganira abaregwa, basabye ko urubanza rwakomeza hakaburanishwa abageze mu rukiko, ababuze bakazahabwa igihe cyabo mu gihe baba babonetse.

    Icyifuzo cyo kubaburanisha ukubiri ariko nticyashyigikiwe n’umucamanza wemeje ko agiye kubahamagaza ahatazwi, abaregwa bakazagaruka mu rukiko nyuma y’ukwezi.

    Itsinda rya kabiri ryo ryari rigizwe n’abantu 33. Byabanje kugorana ko batangira kuburanishwa kuko umucamanza yavuze ko batashoboye guhuzwa n’ababunganira mu buryo bushya bw’ikoranabuhanga rikoreshwa mu manza zo mu Rwanda.

    Ikibazo kivuye mu nzira, umucamanza yavuze ko iri tsinda rigomba kuburanira mu muhezo kuko abaregwa barimo abana.

    Aba baregwa bakabakaba 60 batangiye gutabwa muri yombi mu ntangiro y’umwaka. Ifatwa ryabo ryakurikiye ubushyamirane bwabaye hagati ya zimwe mu mpunzi n’igipolisi.

    Izi mpunzi zari zakambitse ku cyicaro cya HCR zisaba kongererwa ibiribwa zihabwa bitashoboka zikemererwa gusubira mu burasirazuba bwa Kongo aho zikomoka.

    Icyuka cyaje kuba kibi cyane hagati y’impunzi n’igipolisi cyaje gufata umwanzuro wo kuzimishaho ibyuka biryana mu maso ndetse impunzi zikemeza ko zanarashweho amasasu nyayo.

    Ubu bushyamirane bwahosheje buhitanye abagera kuri 11 mu mpunzi nkuko byemezwa na polisi gusa impunzi zo zikemeza ko umubare w’abapfuye uri hejuru y’utangazwa na polisi.

     

  • Mexico yakiriye aba mbere mu bimukira berekeza muri Amerika

    Mexico yakiriye aba mbere mu bimukira berekeza muri Amerika

    Aba mbere mu kivunge cy’abimukira bakomeje urugendo mu gihugu cya Mexico berekeza muri Leta Zunze Ubumwe z’Amerika, bamaze kugera mu murwa mukuru wa Mexico City.

    Abimukira bagera hafi kuri 450, biganjemo abagabo n’abahungu, babaye bacumbikiwe by’agateganyo mu kibuga cy’imikino.

    Iki kivunye cy’abimukira bavuga ko bari mu rugendo rwo kwerekeza muri Amerika – ikivunge kizwi ku izina rya caravan – batangiriye urugendo rwabo mu gihugu cya Honduras mu byumweru bishize.

    Ubu bamaze kuba abimukira bagera hafi ku bihumbi 5.

    Perezida Donald Trump w’Amerika yavuze ko hazoherezwa abasirikare bo kubakumira ngo batarenga umupaka Amerika ihana na Mexico.

    Abanenga Bwana Trump bavuga ko ari kwifashisha ikibazo cy’abikumira bajya muri Amerika mu buryo butemewe n’amategeko, agamije gushyushya abamushyigikiye mbere yuko haba amatora rusange yo muri iki cyumweru.

    Aba bimukira bavuga ko bahunga ibikorwa byo kubibasira, ubukene n’urugomo mu bihugu byabo bya Honduras, Guatemala na El Salvador.

    Benshi mu bari kugera mu kibuga cy’imikino cya Jesus Martinez Palillo, bagenze n’amaguru cyangwa babona imodoka zibunguruza mu buryo bwa ‘lifuti’ bava muri leta ya Veracruz.

    Kenia Alvarado y’imyaka 21 y’mavuko, yabwiye ikinyamakuru El Universal ati:

    “Mu byo navanye muri Honduras, nta na kimwe nsigaranye. N’ejo nabwo nagenze n’amaguru”.

    Ku wa gatanu, Miguel Angel Yunes, Guverineri wa Veracruz, yari yavuze ko imodoka za bisi zizatangwa ngo zigeze abimukira mu murwa mukuru wa Mexico – ariko aza kwisubiraho.

    Abategetsi bo mu mujyi wa Mexico bavuga ko bateguye ibiribwa n’amacumbi ndetse n’imiti n’abunganizi mu mategeko bo gufasha aba bimukira babarirwa mu bihumbi bitezwe kugera muri uyu mujyi mu byumweru bitaha.

    Benshi muri aba bimukira bavuga ko bashaka gusaba ubuhungiro muri Amerika.

    Abandi bimukira babarirwa mu bihumbi bo muri Amerika yo hagati bakomeje urugendo berekeza mu majyaruguru, bava muri leta za Veracruz na Puebla
  • DRC:Abafungwa bo muri gereza ya Beni batorotse

    DRC:Abafungwa bo muri gereza ya Beni batorotse

    Umunyamakuru  ukorera i Beni yatangarije  BBC,  ko abafungwa barenga mirongo itatu batorotse.

    Umushinjacyaha  wa gisirikare mu ntara ya Nord-Kivu, ahabaye icyo gitero, Maj Kazadi Nzengu, yabwiye AFP ati:”Icyicaro cy’ubucamanza bwa gisirikare i Beni cyatewe n’aba Mai-Mai. Abafungwa benshi bashimuswe  abandi baratoroka.”

    Umuvugizi wa gisirikare muri ako karere, Mak Hazukay na we yemeje iby’aya makuru .

    Abo bategetsi babiri nta cyo bavuze ku mubare  nyawo w’abafungwa  bari bafungiwe muri iyo gereza, ndetse  n’umubare wabo ishobora kwakira.

    Mu mijyi myinshi  n’akarere ka Beni hakunze kugabwa ibitero by’abantu bitwaje intwaro bo mu barwanyi bo muri Uganda ADF.

    Ibyo bitero kandi  bishinjwa aba Mai-Mai hamwe n’imitwe y’abarwanyi ishingiye ku bwoko.

  • Ambasaderi wa Turikiya muri Uganda ashobora kuzira ikanzu yambaye mu birori

    Ambasaderi wa Turikiya muri Uganda ashobora kuzira ikanzu yambaye mu birori

    Minisiteri y’Ububanyi n’Amahanga muri Turikiya yahamagaje Ambasaderi w’icyo gihugu muri Uganda, nyuma y’ifoto yakwirakwijwe ku mbuga nkoranyambaga yambaye nk’abagereki ba kera.

    Ambasaderi Sedef Yavuzalp yafotowe ku wa Gatanu w’iki Cyumweru tariki 29 Ukwakira 2018 i Kampala ubwo yari yitabiriye ibirori byo kwizihiza isabukuru y’imyaka 95 Turikiya imaze ibonye ubwigenge.

    Kuri uwo munsi, Sedef yafotowe yambaye ikanzu y’umweru yarengejeho umwitero n’urugori rubengerana nka zahabu mu gahanga, bisa n’imyambarire y’umwamikazi wo mu Bugereki bwa kera uzwi nka Helen of Troy wateje intambara yiswe Trojan War kubera ubwiza bwe.

    Kuri iyo foto kandi hagaragaraho umugabo uri iruhande rwa Ambasaderi Sedef, yambaye umwitero, ku mutwe we hariho ikizingo cy’indabyo imyambaro izwi nka Toga, byagereranyijwe n’imyambarire y’ikigirwamana cy’Abagereki Zeus.

    Iyo foto yarakaje cyane impirimbanyi za demokarasi muri Turikiya, zagaragaje ko ari nk’agasuzuguro kwambara iyo myenda ku munsi nk’uwo w’ubwigenge.

    Ibyo babihera ko iyo tariki ariyo baboneyeho ubwigenge, nyuma y’urugamba rwo kwikura mu maboko y’Abagereki n’Abanyaburayi bari bamaze imyaka hafi itanu basenye ubwami bwa Ottoman.

    Minisiteri y’Ububanyi n’Amahanga ya Turikiya yasohoye itangazo kuri uyu wa Gatandatu ivuga ko yatangiye iperereza kuri iyo myambarire.

    Yagize iti “Icukumbura ryihuse ryahise ritangira nyuma y’itangazwa ry’ariya mafoto ya Ambasaderi wacu ku mbuga nkoranyambaga no mu binyamakuru.”

    Iryo tangazo ryakomeje rivuga ko ambasaderi Sedef yahise ahamagazwa kugira ngo atange ibisobanuro.

    Minisitiri w’Ububanyi n’Amahanga wa Turikiya, Mevlüt Çavuşoğlu, nawe yanditse ku rukuta rwe rwa Twitter ko uyu ambasaderi yahamagajwe.

    Sedef yari amaze imyaka itanu ari Ambasaderi wa Turikiya muri Uganda.

  • Uganda: Abaganga bagiye guhabwa urukingo rwa Ebola

    Uganda: Abaganga bagiye guhabwa urukingo rwa Ebola

    Guhera kuri uyu wa Mbere, Uganda iratangira gutanga urukingo rwa Ebola ku baganga bo mu mavuriro yegereye umupaka uyitandukanya na Repubulika Iharanira Demokarasi ya Congo.

    Kugeza ubu muri Congo hamaze kuboneka abarwayi bagera kuri 230 ba Ebola. Abantu 180 ni bo bamaze guhitanwa nayo.

    Minisiteri y’Ubuzima muri Uganda yatangaje ko nabo icyo cyorezo gishobora kubageraho isaha n’isaha kubera urujya n’uruza rw’abantu hagati y’ibihugu byombi.

    Minisitiri w‘Ubuzima, Jane Ruth Aceng, yavuze ko bazahera ku baganga n’abakozi bo mu bitaro, nka bamwe mu bagerwaho bwa mbere n’abarwayi.

    Ni ubwa mbere urukingo rwa Ebola ruzwi nka -rVSV-ZEBOV- ruzaba rukoreshejwe mu gihugu kitarageramo icyo cyorezo.

    Ishami ry’Umuryango w’Abibumbye ryita ku Buzima, OMS, ryatangaje ko urwo rukingo rwizewe hafi ijana ku ijana kandi ingaruka zarwo ari nke.

    Muri Guinea mu 2015, abahawe urwo rukingo bagaragaje ko rwabagizeho ingaruka zoroheje nko guhinda umuriro, umutwe ndetse n’umunaniro.

    Urukingo rVSV-ZEBOV rumaze guhabwa abantu basaga ibihumbi 16 muri Afurika, u Burayi na Amerika biganjemo ababa bari mu bikorwa by’ubushakshatsi.

    Ubu rukoreshwa gusa ku bantu bafitanye isano ya hafi n’umurwayi wa Ebola cyangwa abahuye na we mu minsi ya vuba.

    Rwakorewe guhangana na Ebola yo mu bwoko bwa Zaire ari nayo mbi cyane mu bwoko bwose bwa virusi za Ebola.

    Uganda izatanga urukingo ku baganga bo mu mavuriro 40 yegereye umupaka nkuko Daily Nation yabitangaje.

    Mu Ntara ya Kivu y’Amajyaruguru muri RDC, abagore batwite n’abana bari munsi y’umwaka umwe ntabwo bemererwa guhabwa urwo rukingo.

    Ntabwo igihe rumara mu mubiri w’umuntu kiramenyekana, gusa ubushakashatsi bumwe na bumwe bwagaragaje ko rushobora kumaramo amezi 12.

  • Iyo RIB itahagoboka mu ibanga umugabo yari yivuganye umugore we

    Iyo RIB itahagoboka mu ibanga umugabo yari yivuganye umugore we

    Umugore witwa Nzitukuze Yvette yatabawe n’ Urwego rw’Igihugu rushinzwe Ubugenzacyaha kubera amakuru yatanzwe n’ umuturage nyiri ugucurirwa umugambi wo kwicwa atabizi.

    Ku mugoroba wo kuri uyu wa Kane nibwo uyu mugabo witwa Ntirenganya Jean Maurice yatawe muri yombi afatiwe mu kabari kitwa Chez Musoni kari ku muhanda uva ku Kicukiro (Sonatube) werekeza mu Mujyi rwagati.

    Umuvugizi w’Urwego rw’Igihugu rushinzwe Ubugenzacyaha, RIB, Mbabazi Modeste, yatangaje ko uyu mugabo yafashwe biturutse ku mikoranire myiza y’uru rwego n’abaturage.

    Uyu mugabo yashakanye n’umugore we witwa Nzitukuze Yvette mu 2007 nyuma y’imyaka ibiri bakundana, ubu bafitanye abana babiri.

    Nzitukuze yabwiye Igihe ko agisama inda y’umwana wa mbere, yasabye umugabo ko bajyana kwa muganga undi amusubiza ko akwiye kwitoza kubaho nk’utamufite, amubaza niba ‘abatagira abagabo ntibababyaza?’.

    Amakimbirane hagati y’uyu mugore n’umugabo yarakomeje kugeza ubwo ngo ntacyo yigeze amufasha no mu kurera abana. Umugore ngo niwe wimenye muri byose kuko yari asigaye acuruza alimentation nyuma yo kugurisha moto ebyiri yari afite akiri inkumi.

    Uyu mugore avuga ko umugabo wo yageze akajya amukubita inkoni akagera ubwo azimenyera. Yigeze kongorera umukozi ngo niwumva yongeye kunkubita uhamagare polisi. Impamvu yasabye umukozi we wo mu rugo kumuhamagarira polisi ni uko uyu mugabo yabanzaga kumwaka amatelefone mbere yo kumukubita.

    Yageze ashaka kumwica, ajya kumuvuzi gakondo amuha ikiraka cyo kwica Nzitukuze, yamwemereye ko n’ amwereka ibimenyetso azamwishyura miliyoni amuha avanse y’ ibihumbi 100.

    Ntirenganya ufungiye kuri sitasiyo ya RIB Kicukiro yavuze ko icyo apfa ni umugore ari uko yamenyeko hari ibyo yamubeshye, ngo yamenye ko umugore we acuruza ndetse ko afite n’ imodoka.

    Umuvuzi gakondo wahawe ikiraka cyo kwica yatse kumenya amaraso ahubwo atanga amakuru kuri RIB, aragenda yereka Ntirenganya ibimenyetso bihimbano ko Nzitukuze yamaze gupfa amwishyura ibihumbi 100.

    Nk’ uko Igihe cyabitangaje Ntirenganya ntabwo aramenya ko umugore we akiri muzima kuko yabwiye RIB ati “Ndasaba imbabazi kuba narishe umugore wanjye […] mwandeka nkazajya nibura kumushyingura?”.

    Ntirenganya akekwaho icyaha by’ubwinjiracyaha giteganywa n’ingingo ya 21 mu itegeko rigena ibyaha n’ibihano. Iyi ngingo isobanura ko ubwinjiracyaha buhanirwa n’ubwo icyari kigambiriwe kitashoboraga kugerwaho bitewe n’impamvu nyir’ugukora icyaha atashoboye kumenya.

    Ubwinjiracyaha bw’icyaha cy’ubugome cyangwa icyaha gikomeye buhanishwa ½ cy’igihano giteganyirijwe icyo cyaha. Ku cyaha gihanishwa igifungo cya burundu, ubwinjiracyaha buhanishwa igihano cy’igifungo kingana n’imyaka 25.