RDC: Ibikorwa byo guhashya Ebola byasubukuwe
Umuryango Mpuzamahanga wita ku Buzima (OMS) watangaje ko ibikorwa byo guhashya icyorezo cya Ebola mu gace ka Beni muri Repubulika Iharanira Demokarasi ya Congo byasubukuwe.
Ku wa Gatandatu Minisiteri y’Ubuzima muri RDC yatangaje ko ibyo bikorwa byabaye bihagaritswe nyuma y’imirwano yabereye hafi y’Ikigo gitegurirwamo ibikorwa by’ubutabazi.
Iyo mirwano yahuje ingabo za Loni ziri mu butumwa bw’amahoro muri RDC (Monusco) n’umutwe w’inyeshyamba za ADF urwanira mu Burasirazuba bwa Congo.
Yatumye bamwe mu bakozi ba OMS bimurirwa i Goma kugira ngo bitabweho nyuma yo guhungabanywa n’igisasu cyatewe kuri hoteli bararagamo.
Umuyobozi Mukuru wa OMS, Tedros Adhanom Ghebreyesus, kuri iki Cyumweru yatangaje ko ibikorwa byo guhashya Ebola bigiye gusubukurwa.
Icyakora Tedros yavuze ko abakorerabushake bari muri ibyo bikorwa umutekano wabo utifashe neza kubera inyeshyamba nk’uko VOA yabitangaje.
Kuva muri Kanama uyu mwaka, Ebola imaze guhitana abantu 213 mu Burasirazuba bwa Repubulika Iharanira Demokarasi ya Congo.
Inyeshyamba za ADF nazo ntizitanga agahenge dore ko zimaze kwica amagana y’abaturage kuva mu 2014 muri ako gace. Mu Cyumweru gishize zishe abasirikare ba Monusco barindwi.
