Umujyi wa Dar es Salaam wasabye abaturage kujya mu mihanda bakishimira ko batsinze Coronavirus
Umuyobozi w’Umujyi wa Dar es Salaam, Paul Makonda, yasabye abaturage ko kuri iki cyumweru biroha mu mihanda bakishimira ko icyorezo cya Coronavirus cyatsinzwe muri Tanzania.
Makonda yabwiye abaturage ko bagura imyenda mishya bakarimba bakitabira ibyo birori muri iyi mpera y’icyumweru. Yasabye ko amaduka amanura ibiciro kugera kuri 80% kugira ngo afashe abaturage kwishima.
Ku rundi ruhande ariko abanya-Tanzania, bafite impungenge ko ibyavuzwe na Makonda bishobora gutuma batubahiriza amabwiriza abuza abantu kwegerana.
Uyu muyobozi avuze ibi mu gihe Ambasade ya Leta Zunze Ubumwe za Amerika muri Tanzania, iherutse kugaragaza impungenge zo kuba iki gihugu giheruka gutangaza imibare ku cyorezo cya Coronavirus, kuwa 29 Mata 2020.
Ubwo Tanzania iheruka gutangaza imibare kuri Coronavirus, hari abantu 509 banduye Covid-19, abayikize 183 na 21 yishe.
Mu itangazo riburira ku bijyanye n’ubuzima, iyi Ambasade yavuze ko ‘ibyago byo kwandura Covid-19 i Dar es Salaam biri hejuru cyane. Nubwo nta raporo z’ubuyobozi zihari, ibimenyetso byose biragaragaza ubwiyongere bw’icyorezo muri Dar es Salaam n’ibindi bice bya Tanzania’.
Ambasade ya Amerika yaburiye abanyamerika baba muri Tanzania n’imiryango yabo kuguma mu rugo keretse abajya gushaka serivisi z’ingenzi nko guhaha ibiribwa ndetse bakabuza abantu kwinjira mu ngo zabo.
Yavuze ko ‘ibitaro byinshi muri Dar es Salaam byuzuye abarwayi muri ibi byumweru bishize’. Ambasade ikomeza ivuga ko ‘ubushobozi buke bw’ibitaro muri Tanzania, bushobora guteza ibibazo birimo gutinda gutanga ubufasha ku barwayi barimo n’aba Coronavirus’. Ibi bikaba byashyira ubuzima bwabo mu kaga.
