U Rwanda rwizeye kwinjiza miliyoni 27$ mu bukerarugendo bushingiye ku nama
U Rwanda rwiteze gukuba kabiri umusaruro uva mu rwego rw’ubukerarugendo bushingiye ku nama (MICE), ukagera kuri miliyoni 27 z’amadolari ya Amerika azava mu nama 45 ziteganyijwe muri uyu mwaka ugereranyije na miliyoni 12,5 yinjijwe umwaka ushize mu bikorwa 61 byakiriwe.
Iki cyizere gishingiye ku kuba ingendo zo mu karere no ku rwego mpuzamahanga zarongeye gusubukurwa ndetse n’icyorezo cya Covid-19 kikaba kirimo kigana ku musozo.
Inkuru dukesha The Eastafrican ivuga ko iyi ntego na none ishingiye ku kuba mbere ya Covid-19 umusaruro uva muri iyi gahunda ya MICE warageze kuri miliyoni zisaga 60 z’amadolari mu 2017 na 2018.
Uru rwego rugiye kongera gukora nk’uko bisanzwe kubera ko ibikorwa bizamura ubukungu bw’igihugu byafunguwe nyuma y’ubukangurambaga bwo gutanga inkingo za Covid-19 bwasize abikingije bageze kuri 60%.
Umuyobozi ushinzwe iyamamazabikorwa muri MICE, Gateretse Samantha, yabwiye The Eastafrican ko nyuma y’imyaka igera kuri ibiri ibintu bihindutse ku isi, ubu urwego rwa MICE rurimo gusubira ku murongo kandi uburyo u Rwanda rwitwaye mu guhangana n’icyorezo cya Covid-19 butanga icyizere cyuzuye ku rwego mpuzamahanga ko abasura u Rwanda n’abafatanyabikorwa barwo mu bucuruzi nta cyabahungabanya.
Kugeza ubu ibikorwa 10 ni byo bimaze kwakirwa mu gihugu muri uyu mwaka wa 2022.
Inama ikomeye ya CHOGM iteganyijwe muri Kamena uyu mwaka byitezwe ko izitabirwa n’abagera ku bihumbi 10 baturutse mu bihugu 53 biri mu muryango w’ibihugu bikoresha Icyongereza (Commonwealth). Ni cyo gikorwa gikomeye kizaba kibereye mu gihugu uhereye mu 2019.
Mbere byari biteganyijwe ko nibura miliyoni 780 z’amadolari ari yo azinjizwa avuye mu kwakira inama ya CHOGM.
Urwego rw’ubukerarugendo bushingiye ku nama rwitezweho kongera kwinjiriza igihugu mu gihe icyorezo cya Covid-19 kirimo kigana ku musozo
