Tanzania:Kuri ubu abanduye Coronavirus bageze kuri 254
Imibare y’abanduye Coronavirus muri Tanzania ikomeje gutumbagira cyane, aho Minisiteri y’Ubuzima yatangaje ko hagati ya tariki 18 na 20 habonetse abarwayi 84, bituma umubare w’abanduye ugera ku bantu 254.
Itangazo ryashyizwe ahagaragara na Minisitiri w’Ubuzima, Ummy Mwalimu, rivuga ko abarwayi bose bashyizwe ahantu barimo kuvurirwa ndetse bameze neza, uretse abarwayi bane bashyizwe ahantu barimo kwitabwaho nk’indembe.
Aba barwayi bashya batumye umubare w’abanduye ugera ku bantu 254, bavuye ku 170 bari batangajwe ku itariki 17 Mata 2020.
Uretse abarwayi bashya bagaragaye, Minisiteri y’ubuzima ya Tanzania yatangaje ko hari abantu batatu iyi ndwara yahitanye, bituma abamaze gupfa bagera ku 10.
Muri abo barwayi, harimo 20 batahuwe muri Zanzibar. Ku ruhande rwa Tanzania, mu barwayi bashya harimo 33 bo mu Mujyi wa Dar es Salaam, Arusha (4), Mbeya (3), Dodoma (3), Kilimanjaro (3), Pwani, (3) Tanga(3), Manyara (2), Tabora (1), Ruvuma (2), Morogoro (2) Rukwa (2), Kagera (1), Mara(1) na Lindi (1).
Kugeza ubu muri Tanzania ibikorwa birakomeje, ntabwo Guverinoma irabifunga ngo abantu bagume mu ngo nk’uko bimeze ku bihugu byo muri aka karere.
