RDC: Urukiko rugiye gutangira kuburanisha Gen. Tshiwewe n’abandi basirikare bakuru
Urukiko Rukuru rwa Gisirikare rwa Gombe muri Repubulika Iharanira Demokarasi ya Congo (RDC) rwiteguye gutangira urubanza ruregwamo abasirikare bakuru bo mu ngabo za FARDC, barimo uwahoze ari Umugaba Mukuru w’Ingabo, Gen. Christian Tshiwewe.
Aba baregwa bakurikiranywe n’Ubushinjacyaha bwa Gisirikare ku byaha bitandukanye birimo umugambi mubisha wo guhungabanya ubutegetsi, kugambanira igihugu, gukwirakwiza ibitekerezo bishyigikira ibikorwa by’iterabwoba, gukwirakwiza amakuru afatwa nk’ibihuha, guhunga igihugu bakajya mu mahanga, ndetse no gutunga mu buryo bunyuranyije n’amategeko intwaro n’amasasu bya gisirikare.
Nk’uko amakuru aturuka mu nzego z’ubutabera bwa gisirikare muri RDC abigaragaza, uru rubanza ruri mu zikurikiranwe cyane kubera urwego rw’abaregwa ndetse n’ibirego bikomeye bashinjwa.
Gen. Christian Tshiwewe yabaye Umugaba Mukuru w’Ingabo za FARDC mbere yo gusimburwa, akaba ari umwe mu basirikare bakuru bagize uruhare rukomeye mu buyobozi bw’ingabo za Congo mu myaka yashize.
Itangira ry’uru rubanza rishobora kugira ingaruka ku rwego rwa politiki n’umutekano muri RDC, cyane cyane mu gihe igihugu gikomeje guhura n’ibibazo by’umutekano muke mu burasirazuba.
Kugeza ubu, ntiharamenyekana igihe nyacyo urubanza ruzatangirira, ariko Urukiko Rukuru rwa Gisirikare rwa Gombe rwatangaje ko imyiteguro yose yarangiye kugira ngo iburanisha ritangire.
