Icyizere ku muti ‘Remdesivir’ wari witezweho guhangana na Coronavirus kirasa n’icyayoyotse

Icyizere ku muti wahabwaga amahirwe menshi yo kuvura abarwayi b’icyorezo cya Coronavirus, kirasa n’icyayoyotse nyuma y’igerageza wakoreweho ariko ntirigire icyo ritanga.

Uyu muti witwa ‘Remdesivir’, wakozwe n’ikigo cyo muri Leta Zunze Ubumwe za Amerika, Gilead Sciences. Ni umwe mu miti yemejwe mu myaka ishize ko uvura abarwayi b’icyorezo cya Marburg na Ebola.

Abashakashatsi bashakaga kumenya niba ushobora no kuvura abarwayi ba Coronavirus. Igerageza ryakorewe ku nguge ryari ryerekanye ko hari amahirwe ko uyu muti wavura Coronavirus, gusa igerageza ryakorewe ku bantu ntacyo ryatanze.

Amakuru y’uko uyu muti wananiwe kuvura Coronavirus yatangajwe ku rubuga rwa OMS ariko nyuma y’akanya gato ahita asibwa nubwo STAT News, izwiho kwandika inkuru z’ubuzima yari yamaze gufata iyo nyandiko.

Umuti wa remdesivir wageragerejwe ku barwayi 237 banduye Coronavirus. Abawuhawe nta kintu wabamariye yaba mu kubavura cyangwa kugabanya ubukana bwa Coronavirus.

Gilead yamaganye ibyavuye mu igerageza byatangajwe na OMS, mu gihe nayo yavuze ko ibyo yatangaje byari ukwibeshya ndetse abantu badakwiye kubifataho umwanzuro wa nyuma.

Leave a Reply

Your email address will not be published.