COVID-19: Habonetse abarwayi bashya 41, abakize ni 4

Minisiteri y’Ubuzima yatangaje ko kuri uyu wa Gatatu tariki 23 Nzeri 2020 mu Rwanda habonetse abantu 41 bashya banduye icyorezo cya COVID-19, mu gihe abandi 4 bakize.

Abo barwayi bashya 41 babonetse mu bipimo 2,273 bakaba barimo 12 babonetse muri Kigali (bapimwe mu bibasiwe kurusha abandi), i Nyagatare habonetse 26 aba bakaba ari abatwara amakamyo yambukiranya imipaka, abandi 3 baboneka muri Nyamagabe.

Kugeza kuri uyu wa Gatatu mu Rwanda abamaze kwandura icyo cyorezo ni 4,779 muri bo abamaze gukira ni 2,995 naho abakivurwa ni 1,757.

Abamaze kwicwa na COVID-19 mu Rwanda bose hamwe ni 27. Uwa 27 yishwe n’icyo cyorezo ku wa Mbere tariki 21 Nzeri 2020, akaba ari umugabo w’imyaka 58 y’amavuko witabye Imana ari i Kigali.

Ku wa Gatandatu tariki 19 Nzeri 2020, nibwo umuntu wa 26 yishwe na COVID-19 mu Rwanda. Uwo muntu wishwe na COVID-19 ni Umunyarwandakazi w’imyaka 26 witabye Imana ari i Kigali.

Ku munsi wari wabanje ku wa Gatanu, nabwo abandi bantu babiri barimo umwe w’imyaka 80 n’undi w’imyaka 29 y’amavuko bitabye Imana bari i Kigali bazize Covid-19.

Abo na bo bari baje bakurikiye undi mugabo w’imyaka 48 y’amavuko na we witabye Imana ari i Kigali ku wa Kane.

Minisiteri y’Ubuzima isaba Abaturarwanda bose gukomeza kwitwararika bubahiriza amabwiriza yo kwirinda ikwirakwira ry’icyorezo cya COVID-19.

 

Leave a Reply

Your email address will not be published.