Abarenga Miliyoni 21 Bamaze Kwandura Virusi ya Corona

Abantu barenga miliyoni 21 ni bo bamaze kwandura virusi ya corona hirya no hino ku isi.

Ni amakuru dukesha kaminuza ya Johns Hopkins yo muri Leta zunze ubumwe z’Amerika. Icyo gihugu ni na cyo kiza ku isonga mu bifite umubare munini w’abanduye iyo virusi.

Abantu barenga miliyoni eshanu bamaze kwandura iyo virusi muri Amerika. Mu gihugu cya Brezil ho hamaze kwandura abarenga miliyoni eshatu.

Senateri Mitt Romney wo muri leta ya Utah aremera ko Leta zunze ubumwe z’Amerika zagaragaje intege nke mu guhangana no gukumira icyo cyorezo, kimaze guhitana Abanyamerika barenga 168,000.

Hagati aho igihugu cya Canada cyamaze gutangaza ko umupaka wa cyo na Leta zunze ubumwe z’Amerika uzakomeza ufunzwe nibura ukundi kwezi. Abemerewe kwinjira ni abakora ibikorwa by’ingenzi kandi bikenewe.

Abantu bamaze kwandura virusi ya corona muri Canada bagera ku 123,000. Abamaze gupfa ni 9,000.

Hagati aho muri Espagne leta yongeye gufata ingamba nshya zo gukumira ubwiyongere bwa virusi ya corona. Ministiri w’ubuzima muri icyo gihugu Salvador Illa yategetse ko inzu z’utubyiniro zifunga mu gihugu hose.

Mu byumweru bibiri bishize, abantu barenga 50,000 bamaze kwandura virusi ya corona muri Espagne.

Canada izakomeza gufunga umupaka wayo na Leta zunze ubumwe z’Amerika kubera gutinya ikwirakwizwa rya virusi ya corona

 

Src:VOA

Leave a Reply

Your email address will not be published.