Perezida Kenyatta na Mohamed ‘Farmajo’ bavuganye ku bushyamirane buri kwiyongera

Perezida wa Somalia na Perezida wa Kenya bavuganye kuri telefone nyuma yaho umwuka mubi wiyongereye mu mubano w’ibihugu byombi, nkuko bitangazwa n’itsinda ryo gutangaza amakuru ryo mu biro bya perezida wa Somalia.

Perezida Mohamed Abdullahi “Farmajo” Mohamed wa Somalia na mugenzi we Uhuru Kenyatta wa Kenya bavuganye mu gitondo cyo kuri uyu wa kane.

Ni nyuma y’umunsi umwe Kenya ishinje igisirikare cya Somalia kugaba igitero hakurya y’umupaka muri Kenya.

Abategetsi bombi bemeranyije gukorana mu kuvugurura umutekano ku mupaka w’ibihugu byombi, ndetse bagashyiraho utunama tubiri tugizwe n’abo ku mpande zombi.

Utwo tunama tugamije kureba uburyo bwo gutsimbataza umubano w’ibihugu byombi ndetse n’ushingiye ku bucuruzi, nkuko byatangajwe n’abo mu biro bya perezida wa Somalia.

Ku wa mbere w’iki cyumweru, abasirikare ba Somalia basenye inyubako mu mujyi wa Mandera mu majyaruguru ya Kenya ubwo barwanaga n’abarwanyi bo muri leta ya Jubbaland ifite ubwigenge bucagase yo muri Somalia.

Mu itangazo yasohoye, Perezida Kenyatta yashinje Somalia kuvogera ubusugire bwa Kenya.

Umwuka w’ubushyamirane umaze igihe wiyongera hagati y’ibi bihugu byombi bisanzwe bitumvikana ku mupaka w’amazi ubigabanya.

Urubanza kuri uwo mupaka ruteganyijwe kuba mu kwezi kwa gatandatu uyu mwaka, mu rukiko mpuzamahanga rwa ONU ruzwi nka International Court of Justice.

Src: BBC