Nyuma yo gutsinda Rayon Sports,APR FC irasatira igikombe
Ikipe ya APR Fc irakoza imitwe y’intoki ku gikombe cya Shampiona nyuma yo gutsinda Rayon Sports ibitego 2-1 kuri Stade Amahoro
Ni umukino watangiranye imbaraga zirimo guhangana nk’uko byari byitezwe, ndetse harimo n’amahane menshi hagati y’abakinnyi b’amakipe yombi.
Ku munota wa 25 w’umukino, Bimenyimana Bonfils Caleb yaje kugongana n’abandi bakinnyi ubwo haterwaga koruneri, ahita ajyanwa kuvuzwa asimburwa na Ismaila Diarra.
Ku munota wa 38 w’umukino, APR Fc yafunguye amazamu, ku mupira waturutse kuri Iranzi Jean Claude, aho yawuhereje Muhadjili nawe wahise acenga ab’inyuma ba Rayon Sports, atera mu izamu neza maze inshundura ziranyeganyega.
Amakipe yombi yasubiye mu rwambariro ari igitego kimwe cya APR Fc, mu gice cya kabiri Rayon Sports iza gukuramo Manishimwe Djabel yinjiza Muhire Kevin.
Ku munota wa 61, APR Fc yaje kubona igitego cya kabiri nacyo cyatsinzwe na Hakizimana Muhadjili.
Ku munota wa 79 Rayon Sports yinjije igitego cyatsinzwe na Kwizera Pierrot, umukino urangira APR Fc itsinze Rayon Sports ibitego 2-1.
Abakinnyi babanje mu kibuga:
APR Fc: Kimenyi Yves; Omborenga Fitina, Emmanuel Imanishimwe, Nsabimana Aimable, Rugwiro Hervé; Mugiraneza Jean Baptiste, Buteera Andrew, Bizimana Djihad, Iranzi Jean Claude, Bigirimana Issa; Hakizimana Muhadjili
Rayon Sports: Ndayishimiye Eric Bakame; Nyandwi Saddam, Eric Rutanga, Manzi Thierry, Usengimana Faustin; Mukunzi Yannick, Niyonzima Olivier Sefu, Kwizera Pierrot; Manishimwe Djabel, Bimenyimana Bonfils Caleb; Shabban Hussein Tchabalala
Dore uko imikino yose yagenze:
Gicumbi FC 2-0 Musanze FC
Kirehe FC 1-0 AS Kigali
Espoir FC1-0 Amagaju FC
Sunrise FC 1-1 Mukura VS
APR FC 2-1 Rayon SportS
Police FC 0-0 Marine FC
Miloplast FC 0-0 Etincelles FC
