COVID-19:Mu Rwanda hatahuwe abarwayi bashya 79, hakira 31
Minisiteri y’Ubuzima yatangaje ko kuri uyu wa Kabiri tariki ya 1 Nzeri 2020, habonetse abarwayi bashya 79 b’icyorezo cya Koronavirusi (COVID-19) mu bipimo 5,622 byafashwe mu masaha 24 ashize, hatangazwa n’abantu 31 bakize neza.
Umubare w’abamaze gutahurwaho icyo cyorezo mu Rwanda wageze ku 4,142, barimo abamaze gukira bagera ku 2,044 na 2,082 bakirimo kwitabwaho n’abaganga. Iki cyorezo kimaze gutwara ubuzima bw’abarwayi 16 mu Rwanda.
Abo bose batahuwe mu bipimo 415,392 bimaze gufatwa kuva umurwayi wa mbere yatahurwa mu Rwanda.
Abarwayi bashya barimo 51 batahuwe mu bahuye n’abanduye no mu bibasiwe kurusha abandi, 13 bo mu Karere ka Rusizi, batandatu bo mu Karere ka Rubavu, batanu bo muri Karongi, na bane bo muri Gisagara.
Igikorwa cyo gupima abantu mu buryo bwa rusange mu Gihugu kirakomeje. Ingendo zihuza Intara n’Umujyi wa Kigali mu modoka rusange zarahagaritswe mu rwego rwo kwirinda ikwirakwizwa ry’icyorezo cya COVID-19
Kuri ubu ubishatse wese arimo gupimwa COVID-19, akamenya uko ahagaze ndetse agahabwa ikemezo kemeza ko ari muzima.
Abaturarwanda barasabwa kurushaho kubahiriza amabwiriza yo kwirinda ari yo gusiga intera ya metero, kwambara udupfukamunwa no gukaraba intoki kenshi bakoresheje amazi meza n’isabune cyangwa arukoro yabugenewe.
Imibare yatangajwe ku rwego mpuzamahanga yerekana ko muri Afurika abamaze kwandura COVID-19 bageze kuri miriyoni n’ibihumbi 252, barimo ibihumbi 985.8 bakize n’abandi basaga ibihumbi 29.8 bahitanywe na cyo. Abamaze kwandura ku Isi bararenga miriyoni 25.7, barimo abakize barenga miriyoni 18 n’abapfuye barenga ibihumbi 857.5.
