Coronavirus: Banki y’isi yemereye u Burundi miliyoni $5 yo kurwanya Covid-19

Banki y’isi yatangaje ko yemeye guha leta y’u Burundi inkunga ya miliyoni eshanu z’amadorari y’Amerika kugira ngo iki gihugu gikomeze inzego z’ubuzima bw’abantu mu kwitegura no guhangana na coronavirus.

Banki y’isi ivuga ko iyi nkunga ivuye mu kigega cyayo ‘International Development Association’ (IDA), igamije gufasha u Burundi gukumira ubwandu bushya bwa coronavirus.

Ivuga kandi ko iyo nkunga izafasha kongerera ubushobozi laboratoire zo gupima, gutegura no kubona ibikoresho byo kuvura no guhugura abakozi b’ubuzima ku nzego zitandukanye mu gihugu.

Minisiteri y’ubuzima mu Burundi ivuga ko hamaze kuboneka abantu batanu (5) banduye coronavirus, ko umwe ari we imaze guhitana.

Abantu batandukanye banenga leta y’u Burundi ko nta ngamba yafashe imbere mu gihugu mu kwirinda ikwirakwira ry’iki cyorezo.

Abategetsi mu Burundi bavuga ko ingamba zigenda zifatwa bitewe n’uko iki cyorezo kifashe mu gihugu.

Banki y’isi ivuga ko iri gutegura gutanga inkunga yihutirwa ya miliyari 14 z’amadorari ku bihugu bikennye kugira ngo bibashe guhangana n’iki cyorezo.

Iyi banki ivuga kandi ko izatanga inkunga yagutse ya miliyari $160 yo gufasha ibihugu mu bindi birimo kurengera abazahaye, gufasha business no kuzahura ubukungu.

Inzobere mu bukungu n’imari zivuga ko ingaruka z’iki cyorezo zizakomerera ubukungu bw’isi n’imibereho y’abantu uri rusange, cyane cyane abakennye kurusha abandi.

International Development Association (IDA) ni ikigega cya Banki y’isi cyo gufasha ibihugu bikennye kurusha ibindi.

Iki kigega cyashyizweho mu 1960, gitanga inkunga n’inguzanyo zitariho inyungu ku mishinga y’iterambere no kurwanya ubukene.

IDA iri mu bitanga inkunga nini ku bihugu 76 bikennye cyane ku isi, muri byo 39 ni ibyo muri Africa nk’uko iyi banki ibivuga.

 

Src:BBC