Algeria: hadutse imyigaragambyo yamagana Perezida Bouteflika kwiyamamariza manda ya 5

Abantu babarirwa mu bihumbi amacumi muri Algeria bigabije imihanda mu kugaragaza uburakari bafitiye Perezida Abdelaziz Bouteflika w’imyaka 82 y’amavuko ufite gahunda yo gushaka kongera kwiyamamaza ngo ategeke iki gihugu cyo mu majyaruguru y’Afurika kuri manda ya gatanu.

Polisi yarashe imyuka iryana mu maso ku bigaragambya mu murwa mukuru Alger.

Abategetsi bavuze ko abigaragambya barindwi n’abapolisi barenga 50 bakomeretse, naho abandi bantu 45 batabwa muri yombi.

Imyigaragambyo yamagana leta iba gacye cyane muri Algeria, ariko myinshi yarabaye kuva Bwana Bouteflika yakwemeza ko azongera kwiyamamaza mu matora ya perezida ateganyijwe kuba mu kwezi gutaha kwa kane uyu mwaka.

Kuva yarwara indwara y’imitsi yo mu bwonko mu mwaka wa 2013, Bwana Bouteflika aboneka gacye cyane mu ruhame, ndetse kuri ubu arigukorerwa ibizamini byo kwa muganga mu Busuwisi.

Ubwo bagendaga mu mihanda yo mu murwa mukuru Alger ku wa gatanu, bamwe mu bigaragambya bari bafite ibyapa byanditseho ngo “kurekera aho bisobanuye kurekera aho”. Abandi bashimangiraga ko bashaka kwigaragambya mu mahoro.

Umugore umwe mu bigaragambyaga wari uri kumwe n’umugabo we n’abana, yabwiye ibiro ntaramakuru AFP ati: “Imyaka 20 irahagije”.

Ibiro ntaramakuru Reuters byo byasubiyemo amagambo ya Ali Selmi, na we wigaragambyaga, agira ati: “Uyu ni umunsi w’ibyishimo, ntabwo ari uw’imyigaragambyo. Turikwishimira kongera kuvuka kwa Algeria”.

Bamwe mu bigaragambyaga bateye amabuye hafi y’inyubako y’ibiro bya Bwana Bouteflika, nuko basubizwa inyuma na polisi yarasaga imyuka iryana mu maso. Ababibonye bavuze ko habayeho gukomereka ku mpande zombi.

Imyigaragambyo kandi yanabereye mu yindi mijyi myinshi yo muri Algeria nyuma y’amasengesho y’abayisilamu yo ku wa gatanu.

Bwana Bouteflika yageze ku butegetsi mu mwaka wa 1999. Ashimirwa kuba yararangije intambara yasubirishanagamo abatuye iki gihugu bigereranywa ko yahitanye abantu barenga ibihumbi 100.

Abonwa nk’ushobora gutsinda amatora yimirije

Mu mwaka wa 2011, muri Algeria habaye imyigaragambyo yo kwinubira ibiciro by’ibiribwa ndetse no kubura akazi. Hari mu myigaragambyo migari yabaye mu burasirazuba bwo hagati guhera mu mpera y’umwaka wa 2010 – imyigaragambyo yamenyekanye ku izina rya Arab Spring.

Ariko icyo gihe, Bwana Bouteflika yahise akuraho amategeko yo mu bihe bidasanzwe iki gihugu cyari kimaze imyaka hafi 20 kigenderaho – aba yubahirije atyo icy’ingenzi abigaragambyaga basabaga.

Nyuma yo kurwara indwara y’imitsi yo mu bwonko, yongeye gutsinda amatora yanenzwe n’abatavuga rumwe n’ubutegetsi, ndetse asesa ikigo cy’ubutasi cy’iki gihugu agisimbuza ikindi kimuyoboka.

Abanenga Bwana Bouteflika bavuga ko ubuzima bwe butameze neza butuma adashoboye kuzuza inshingano ze nka Perezida.

Nubwo hari abamunenga, Bwana Bouteflika abonwa na benshi ko ari we ufite amahirwe menshi yo gutsinda aya amatora ateganyijwe kuba mu kwezi gutaha kwa kane.