Abantu 139 banduye Cholera muri Mozambike

Muri Mozambike, abantu bamaze kwandura cholera nyuma y’imvura ivanze n’umuyaga mwinshi, ejo kuwa kane bari bageze kubantu 139, mu gihe ubuyobozi  burimo kwitegura gushyiraho gahunda yo gukingira abaturage  mu ntumbero yo kugabanya imibare y’abandura. Iyi mibare igaragaza abamaze kwandura yashyizwe ahagaragara na Minisitiri w’ubuzima , Ussein Isse.

Perezida wa Mozambike Filipe Nyusi ejo kuwa kane yabwiye abanyamakuru ko ubuyobozi  bwategetse ko hakorwa ibikorwa byo gutabara abakozweko n’icyo kiza cyo kw’itariki 15 z’ukwezi kwa gatatu. Avuga ko Mozambike itari bwigere iba mu bihe nk’ibi.

Ibi biza  by’imvura n’umuyaga udasanzwe  byahitanye abantu 468, abandi  bagera  kuri miliyoni 1.85 ntibagira aho barambika umusaya.

Umuyobozi wa OMS David Wightwick yavuze ko ibikorwa byo gutanga inkingo  bitangirana n’icyumweru gitaha. Inkingo  900,000 nizo zitezwe mu gihugu ku musi wa mbere.