Abantu 1000 batawe muri yombi mu myigaragambyo yakomerekeyemo 135 mu Bufaransa

Polisi yo mu Bufaransa yataye muri yombi abantu 1000 mu guhosha imyigaragambyo y’abatavuga rumwe na Leta yabereye mu Mujyi wa Paris ku wa 8 Ukuboza 2018.

Minisitiri w’Umutekano mu Bufaransa, Christophe Castaner, yatangarije Ibiro Ntaramakuru by’Abafaransa (AFP) ko abantu 135 barimo n’abapolisi 17 bayikomerekeyemo.

Iyi myigaragambyo yateguwe n’Umuryango wiswe “Yellow-vest movement” yaturutse ku izamurwa ry’umusoro ku bikomoka kuri peterori n’imibereho ihanitse y’abaturage byanatumye Perezida Emmanuel Macron yukwa inabi.

Abigaragambya baseruka mu myenda y’umuhondo mu kugaragaza itegeko ryo mu 2008 ryemeje umwambaro uranga abatwara imodoka unabafasha mu bwirinzi bw’impanuka zo mu muhanda. Uyu muryango watangirijwe kuri internet muri Gicurasi mu 2018, watumye ku wa 17 Ugushyingo hakorwa imyigaragambyo mu Bufaransa.

Mu mpera z’icyumweru gishize, mu gihugu hose abarenga 125 000 bongeye kwirara mu mihanda, barimo abagera ku 10 000 bari i Paris.

Abigaragambya bangije amadirisha y’amaduka, banatwika ibintu bitandukanye i Paris. Ubwo baganaga ku Ngoro y’Umukuru w’Igihugu ya Élysées bakomwe mu nkokora na polisi, yabatatanyije ikoresheje imyuka iryana mu maso.

Abari mu mihanda bari bitwaje ibyapa biriho ubutumwa buhamagarira Perezida Emmanuel Macron kwegura ndetse u Bufaransa bugategura amatora yihuse.