NESA yatangaje uko ingendo z’abanyeshuri bitegura igihembwe cya gatatu zizakorwa
Ikigo cy’Igihugu gishinzwe Ibizamini n’Ubugenzuzi bw’Amashuri (NESA) cyatangaje ko abanyeshuri biga bacumbikirwa bazatangira gusubira ku mashuri kuva ku wa 17-20 Mata 2026.
Ni mu itangazo iki kigo cyashyize hanze ku wa 10 Mata 2026.
Ni ingengabihe izafasha gutangiza igihembwe cya gatatu ari na cyo cyanyuma cy’umwaka w’amashuri wa 2025/2026.
Ku wa 17 Mata 2026 hazatangira kugenda abiga mu turere twa Ruhango, Gisagara, Ngororero, Nyagatare, Gatsibo na Musanze.
Hazakurikiraho abiga muri Huye, Nyamagabe, Nyabihu, Rubavu, Burera, Rwamagana na Kayonza bazagenda ku wa 18 Mata.
Ni mugihe abiga muri Nyanza, Kamonyi, Karongi, Rutsiro, Rulindo, Gakenke, Ngoma na Kirehe bo bazatangira kugenda ku wa 19 Mata 2026.
Ingendo z’abanyeshuri zizasozwa ku wa 20 Mata 2026 aho abiga i Muhanga, Nyaruguru, Rusizi, Nyamasheke, Bugesera, Gicumbi, Nyarugenge, Gasabo na Kicukiro ari bo bazagenda.
Ababyeyi basabwe kubahiriza gahunda y’izi ngendo, kohereza abanyeshuri hakiri kare ndetse bakabagenera amafatanga y’ingendo azabageza ku ishuri n’azabagarura igihembwe kirangiye.
Abanyeshuri na bo basabwe kugenda bambaye impuzankano y’ishuri bigaho.
Ku rundi ruhande, abashinzwe uburezi mu turere no mu mirenge bibukijwe gukurikirana izi ngendo n’uko amashuri yiteguye kwakira abanyeshuri bayo.
Umwihariko ku banyeshuri bahagurukira i Kigali, n’abandi bahanyura berekeza mu ntara, bazajya bafatira imodoka ku kibuga cya ‘Kigali Pele Stadium’. Icyakora, nyuma ya Saa Cyenda z’amanywa iki kibuga kizajya gihita gifungwa.
NESA yatangaje uko ingendo z’abanyeshuri zizakorwa muri ku wa 17 Mata 2026
