AU yibutse abishwe muri Jenoside yakorewe Abatutsi, yiyemeza kurwanya imvugo z’urwango
Umuryango wa Afurika Yunze Ubumwe (AU) wifatanyije n’Isi kwibuka ku nshuro ya 32 Jenoside yakorewe Abatutsi mu Rwanda muri Mata 1994, wiyemeza kurwanya ibirimo imvugo z’urwango zikomeje kwiyongera mu kwirinda ko ibyabaye mu Rwanda byagira ahandi biba.
Abayobozi batandukanye, abahagarariye ibihugu byabo n’abarokotse Jenoside bahuriye ku cyicaro gikuru cya AU, i Addis Ababa muri Ethiopia mu muhango wo kwibuka no kunamira Abatutsi barenga miliyoni bishwe muri Jenoside. Byabaye kuri uyu wa Kabiri tariki 7 Mata 2026.
Uyu muhango waranzwe n’urugendo rwo kwibuka, gucana urumuri rw’icyizere no kumurika urwibutso koranabuhanga rujyanye no kubahiriza uburenganzira bwa muntu.
Komiseri wa AU ushinzwe Politiki, Amahoro n’Umutekano, Bankole Adeoye, yavuze ko uyu munsi wibutsa Abanyafurika ko basangiye inshingano zo guharanira ko ibyabaye bitazasubira ukundi.
Ati “Uyu munsi twifatanyije na Guverinoma n’abaturage beza b’u Rwanda mu guha icyubahiro abarenga miliyoni bishwe. Turi kumwe ndetse gushimangira ubutumwa bumwe ‘Ntibizongere ukundi.”
Intumwa ya AU ishinzwe kurwanya Jenoside, Adama Dieng, yasabye ko hashyirwa imbaraga mu kurwanya ko ibyabaye mu Rwanda bitasubira ukundi.
Ati “Tugomba gushimangira ubushake bwacu bwo guharanira ubutabera, kongera ingufu mu nshingano duhuriyeho kugira ngo twirinde ko ubu bwicanyi ndengakamere bwazasubira.”
Intumwa yihariye ya Loni muri AU, Parfait Onanga Anyanga yashimye ikoranabuhanga rikoreshwa mu gusigasira amateka no kwibuka.
Ati “Guhuriza ku ikoranabuhanga urwibutso rw’uburenganzira bwa muntu ni uburyo bwiza bwo kurwanya Jenoside. Loni yifatanyije na AU.”
Perezida wa Komisiyo ya AU, Mahmoud Ali Youssouf,, yagize ati “Turibuka miliyoni irenga y’abishwe kubera urwango, kutita ku bantu no kudashyira mu gaciro ngo abantu bagire icyo bakora. Kwibuka si uguheranwa n’agahinda ni igihe cyo guharanira ukuri, kubazwa inshingano no kuba maso.”
Uyu muyobozi yavuze ko Afurika igomba kwimakaza ibikorwa byo guharanira ko ibyabaye bitazasubira ukundi, imvugo z’urwango n’amacakubiri bikomeje gufata indi ntera bigakumirwa abantu bakunga ubumwe.
Umuyobozi wa Komisiyo y’Umuryango wa Afurika Yunze Ubumwe (AU), Mahmoud Ali Youssouf, yayoboye igikorwa cyo kwibuka ku nshuro ya 32 Jenoside yakorewe Abatutsi
Abitabiriye urugendo rwo kwibuka Jenoside yakorewe Abatutsi mu 1994 i Addis Ababa muri Ethiopia
