Tumenye inanasi, Imbuto iryoshye kandi ifitiye akamaro kanini umubiri n’ubukungu

Inanasi ni imwe mu mbuto zifite isoko rinini n’akamaro kadasanzwe ku buzima bw’abantu. Irangwa n’impumuro nziza, uburyohe budasanzwe, kandi ikungahaye ku ntungamubiri z’ingenzi. Mu Rwanda, inanasi ni kimwe mu bihingwa byinjiriza abahinzi amafaranga, ikanateza imbere ubukerarugendo bushingiye ku musaruro kamere.

Ibyiza by’inanasi ku buzima

1. Ifasha igogora: Inanasi irimo enzyme yitwa bromelain ifasha igifu gusya neza ibyo umuntu yariye, ikanagabanya kuribwa mu nda cyangwa umubyimba w’inda nyuma yo kurya.
2. Ikungahaye kuri Vitamini C: Iyi mbuto igira uruhare rukomeye mu kongerera umubiri ubudahangarwa, ikarwanya indwara zifata mu kanwa no mu myanya y’ubuhumekero.
3. Igabanya umunaniro n’umuhangayiko: Inanasi irimo manganese na tryptophan, bifasha ubwonko gukora neza, bigatuma umuntu agira imitekerereze isobanutse kandi akagira imbaraga.
4. Ivangura ibinure: Inanasi ni isoko nziza y’amazi n’isukari karemano, bigatuma igabanya ubushake bwo kurya cyane, bityo ifasha n’abashaka kugabanya ibiro.
5. Irwanya ububabare bw’imitsi: Iyi mbuto ifasha mu kurwanya ububabare bw’imitsi n’amagufa, cyane cyane ku bantu bafite indwara ya arthritis.

Mu turere tw’u Rwanda nka Rulindo, Bugesera, na Ngoma, abahinzi bamaze kubona inyungu nyinshi zivuye mu gihingwa cy’inanasi. Kubera uburyo igira isoko rinini mu Rwanda no mu mahanga, cyane cyane ku masoko ya CEPEX na EAC, abahinzi bayihinga neza babona inyungu irambye.

Ikigo cy’igihugu gishinzwe iterambere (RDB) kimaze igihe gishyigikira ba rwiyemezamirimo bato n’abaciriritse mu buhinzi bw’inanasi, binyuze mu kubaha imbuto z’indobanure, amahugurwa n’isoko 

Inanasi ntisaba amazi menshi, ikura neza mu butaka butameze nabi cyane, kandi ishobora kwezwa inshuro imwe mu myaka ibiri. Ibi bituma ihingwa ryayo riba icyitegererezo ku bahinzi bafite ubutaka buto bashaka kubona umusaruro mwinshi.

Inanasi zisarurwa zitararibwa ziratunganywa mu nganda zigatunganywamo umutobe, confiture, imitobe yo mu macupa (juice concentrates), ndetse n’isukari ya naturel ikoreshwa mu biribwa. Abacuruzi bato n’abaciriritse bazigurisha ku masoko y’imbere mu gihugu no mu mijyi, aho zifite abakiliya benshi.

Inanasi si imbuto isanzwe. Ni umutungo kamere ushobora kuzamura ubukungu bw’umuhinzi ndetse n’umwimerere w’u Rwanda mu ishoramari n’ubucuruzi. Kuyihinga neza no kuyirya kenshi ni ugushora mu buzima buzira umuze.

Umwanditsi: Uwamliya Florence