Abarenga 5000 bamaze kwicwa na Ebola ya kabiri yishe abantu benshi ku isi
Abategetsi bo muri Repubulika ya Demokarasi ya Congo (DRC) bavuga ko ubwoko bwa Bundibugyo bwa virusi ya Ebola ubu bufitanye isano n’impfu zirenga 5,000, intambwe iteye impungenge ku ngano n’ikwirakwira rikomeje kubaho ry’iki cyorezo.
Muri raporo ryatangaje ku wa gatanu, itsinda ryo mu biro bya perezida wa DRC rishinzwe ibikorwa byo kurwanya Ebola ryavuze ko abantu 10,351bamaze kwemezwa ko banduye Ebola kuva itangiye, barimo 5,026 bapfuye. Abategetsi bo mu rwego rw’ubuvuzi banatangaje ko abantu bashya 77 bemejwe ko banduye Ebola, naho abandi bantu 34 barapfa.
Iyo raporo igira iti: “Intara ya Ituri iracyari izingiro ry’iki cyorezo, ikaba yihariye 71.0% by’abantu bose bemejwe ko banduye batangajwe ndetse na 36.4% by’abantu bashya bemejwe ko banduye batangajwe ku rwego rw’igihugu.”
Mu turere tw’ubuzima 178 twa DRC, 67 muri two twatangaje ko twabonetsemo abanduye Ebola. Iki cyorezo kimaze kugera mu ntara umunani muri 26 zigiye icyo gihugu, ndetse iki cyorezo gifite igipimo cyo kwica kiri ku rugero rwa 48.6%.
Abategetsi bo mu rwego rw’ubuvuzi bavuze ko abarwayi 1,101 ubu barimo kwitabwaho ahavurirwa Ebola no mu bigo by’akato, mu gihe abantu 2,788 bakize iyi ndwara.
Nubwo ibikorwa byo kurwanya Ebola bikomeje, umutekano mucye mu bice byo mu burasirazuba bw’igihugu byibasiwe n’iki cyorezo watumye akazi k’abakozi bo mu rwego rw’ubuzima kagorana. Mu duce tumwe, amatsinda yo kurwanya Ebola yashyizweho inkeke ndetse aterwa n’abantu badashyigikiye ingamba zo kurwanya Ebola.
Kugeza ubu nta rukingo rwemewe ruriho rw’ubu bwoko bwa Bundibugyo bwa virusi ya Ebola. Urukingo rwa Ervebo, rwakoreshejwe mbere mu byorezo by’ubwoko bwa Zaïre bwa virusi ya Ebola, buherutse gukoreshwa mu gufasha kurinda abaganga hamwe n’abakozi bakora mu bikorwa byo kurwanya Ebola aho yiganje.
Ishami ry’Umuryango w’Abibumbye ryita ku buzima (OMS/WHO) ryakomeje gusaba inkunga y’inyongera yo gufasha mu bikorwa byo kurwanya Ebola, mu gihe hari impungenge ko Ebola ishobora gukwirakwira ahandi kurushaho.
Ibihugu byinshi byo muri Afurika byakajije ingamba zo kugenzura no kwitegura Ebola, nyuma yuko umuntu wanduye Ebola aherutse kuboneka muri Nigeria. Uganda, Kenya n’Ubufaransa na byo byatangaje abanduye bafite aho bahuriye n’iki cyorezo muri rusange.