Urukingo rwa mbere rwa malariya’ rugiye kugeragerezwa muri Malawi
Igerageza ryagutse rya mbere ku isi ry’urukingo rwa malaria rigiye gukorerwa muri Malawi, kuri ubu abana barahabwa uru rukingo ngo rubahe ubwirinzi bw’iyi ndwara ,n’ubwo nabyo bigikenewe kunganirwa.
Uru rukingo rutanga ubwirinzi bw’umubiri mu kurwanya udukoko dutera malaria dukwirakwizwa n’imibu.
Mbere yaho, habayeho amagerageza mato yagaragaje ko ku kigero cya 40%, abana bari hagati y’amezi 5 na 17 bahawe uru rukingo rwabarinze kurwara malaria.
Ishami ry’umuryango w’abibumbye ryita ku buzima, OMS, rivuga ko muri ibi bihe malaria yiyongereye, mu gihe hari hashize imyaka 10 umuhate wo kuyihashya utanze umusaruro.
Imibare ya vuba iheruka yo ku rwego rw’isi igaragaza ko malaria itakigabanuka, bigatera impungenge zuko ishobora kongera kwaduka mu buryo bukomeye.
Hejuru ya 90% y’abayirwaye n’abantu ibihumbi 435 yishe bose ni abo muri Afurika. Abana ibibasira by’umwihariko.
Mu mwaka wa 2017, abantu hafi miliyoni eshanu barwaye malaria muri Malawi. Iki gihugu, Kenya na Ghana nibyo byatoranyijwe gukorerwamo igerageza ryagutse ry’uru rukingo.
Urukingo rumaze imyaka myinshi rukorwa
Ibi bihugu byatoranyijwe kuko bisanzwe binafite gahunda zo kurwanya malaria, ariko kandi bigakomeza kugira umubare munini w’abayirwara.
Kuva mu mwaka wa 1987, abashakashatsi bo muri kompanyi yitwa GSK yo mu Bwongereza batangiye gukora no kugerageza urukingo rwa malaria, kugeza ubu rukaba rumaze gutwara agera kuri miliyari imwe y’amadolari y’Amerika.
Igerageza riheruka ryagenzuwe na OMS, ivuga ko uru rukingo hari ikigero rurindaho abana.
Ikigero cya 40 ku ijana (40%) cy’imbaraga zo kurinda k’uru rukingo ntabwo kiri hejuru ugereranyije n’izindi nkingo, ariko OMS ivuga ko hiyongereyeho ingamba zisanzwe nk’inzitiramibu no kurwanya imibu bizatanga umusaruro.
Uru rukingo ruzajya rutangwa inshuro enye: rimwe mu kwezi mu mezi atatu, ku nshuro ya kane umwana aruhabwe hashize amezi 18.
Iri geragezwa ryatangiriye muri Malawi, mu byumweru biri imbere bikaba biteganyijwe ko rikomereza no muri Kenya na Ghana. Biteganyijwe ko rizarangira mu mwaka wa 2023.
