Sudani: Omar al-Bashir yagejejwe muri gereza

Omar Al Bashir uherutse guhirikwa ku butegetsi n’igisirikare akabanza gufungirwa mu nzu icungiwe umutekano, yajyanywe muri gereza yo mu murwa mukuru Khartoum.

Umwe mu ba hafi mu muryango we yabwiye itangazamakuru ko Bashir “yajyanywe muri gereza ya Kober i Khartoum mu ijoro ryashize” nkuko JeuneAfrique yabitangaje.

Imyaka 30 y’ubutegetsi bwa Bashir yashyizweho iherezo n’igisirikare kuwa 11 Mata 2019 nyuma y’imyigaragambyo y’abaturage yari imaze amezi ane.

Icyakora ihirikwa rya Bashir ntiryanyuze abigaragambya kuko bakiri mu mihanda basaba ko inama nkuru y’igisirikare yahiritse Bashir ikaba iyoboye inzibacyuho, nayo yavaho hakajyaho ubutegetsi bwa gisivile.

Bashir w’imyaka 75 yashyiriweho impapuro zo gutabwa muri yombi n’urukiko mpanabyaha mpuzamahanga (ICC) ngo akurikiranweho ibyaha bya Jenoside byakorewe mu ntara ya Darfur guhera mu 2003.

Akanama ka gisirikare kafashe ubutegetsi kuwa Gatanu w’icyumweru gishize katangaje ko katazatanga Bashir ngo aburanishwe n’amahanga. Icyakora kuwa Mbere Gen Sheikh Jalaluddin, umwe mu bagize akanama kayoboye igihugu, yavuze ko icyemezo kizafatwa na Guverinoma ya gisivile nimara kujyaho.

Ku wa Kabiri w’iki cyumweru Leta ya Uganda yari yatangaje ko yiteguye guha ubuhungiro Bashir naramuka abusabye.

Loading

Leave a Reply

Your email address will not be published. Required fields are marked *