Rwanda: Dore Imishinga 10 y’ Ubuhinzi Yashowemo Akayabo ka Miliyari $592.8 z’ Amadolari

Mu rwego rwo guteza imbere ubuhinzi mu Rwanda, hashyizweho imishinga minini ifite intego yo kuzamura umusaruro w’abahinzi, guteza imbere ubworozi, no kongera agaciro ku bicuruzwa by’ubuhinzi. Dore imishinga y’ingenzi yashoweho amafaranga menshi, uhereye ku mishiga ifite ingengo y’imari ntoya ukageza kuri iyo hejuru:

Ikigo cy’imbuto cya RICA (Rwanda Seeds Centre) cyashowemo $12 miliyoni amadolari

kigo giherereye muri RICA kigamije kongera umusaruro w’imbuto no kuzikwirakwiza ku bahinzi. Kizatanga imbuto zifite ireme kugira ngo abahinzi bongere umusaruro wabo, bityo bigire uruhare mu iterambere ry’ubuhinzi mu gihugu.

Umuyoboro wa Muyanza (Muyanza Dam) watwaye $16.5 miliyoni z’ amadolari.

Muyanza Dam akaba ari umuyoboro ugamije gutanga amazi yuhira imisozi n’imyanya y’ibishanga ukaba Ufite ubushobozi bwo kubika metero kibe miliyoni 2.4 z’amazi, bikazafasha abahinzi 42,549 bo mu ngo 9,096 kuzamura umusaruro w’ubuhinzi.

Uruganda rukora ifumbire rwa Bugesera (Bugesera Fertilizer Blending Plant) Rwatwaye $20 miliyoni z’ amadolari.

Uru ruganda rukora ifumbire iboneka ku giciro gito kugira ngo rufashe abahinzi kongera umusaruro. Rufite ubushobozi bwo gukora tonne 100,000 z’ifumbire buri mwaka. Rwashinzwe ku bufatanye na OCP Africa, rugamije kongera umusaruro w’ubuhinzi mu Rwanda.

Umushinga Green Gicumbi, watwaye asaga $30 miliyoni z’ amadolari

Uyu mushinga ugamije guteza imbere ubuhinzi burengera ibidukikije no gukomeza kongera ubushobozi bwo guhangana n’ihindagurika ry’ibihe. Ukaba uherereye mu Karere ka Gicumbi aho Utanga ibisubizo birambye bigamije kongera umusaruro w’ubuhinzi no kurinda ibidukikije.

Umushinga wa Gako Beef Project washowemo $35.3 miliyoni z’ amadolari.

Uyu mushinga ugamije guteza imbere ubworozi bw’inka zitanga inyama zororerwa ku butaka bwa hegitari 6,000 mu Karere ka Bugesera bikaba byitezwho ko ugomba guteza imbere ubworozi bw’inka, kuzongerera ibiro no gutunganya inyama byoherezwa ku isoko ryo mu Rwanda no mu mahanga.

Umushinga wo kuhira Nasho (Nasho Irrigation Project) watwaye $54 miliyoni z’ amadolari.

Uyu mushinga ufasha abahinzi bato bangana n’ ibihumbi 2,099 kubona amazi yo kuhira imyaka hakoreshejwe ikoranabuhanga rya center pivot irrigation.

Uyu mushinga kandi ni n’ ikigo gitanga amashanyarazi akomoka ku mirasire y’izuba aho gifite ubushobozi bwo gutanga megawati 3.3

Umushinga wo kuhira muri Kayonza (Kayonza Irrigation and Integrated Watershed Management Project) nawo watwaye asaga $61 miliyoni z’ amadolari.

Uyu mushinga ugamije guteza imbere umutekano w’ibiribwa binyuze mu kongera amazi yuhira imyaka no kurwanya isuri kandi ukaba Uzafasha ingo z’abahinzi bo mu Burasirazuba bw’u Rwanda kuzamura umusaruro wabo, bityo ubuzima bwabo bugere ku rwego rwiza.

Ishuri ry’Ubuhinzi n’Ibidukikije rya RICA (Rwanda Institute for Conservation Agriculture – RICA) naryo ryatwaye $84 miliyoni z’ amadolari.

Iki kigo cya RICA giherereye i Gashora, kikaba ari ishuri rikomeye ry’ubuhinzi n’ibidukikije gitanga uburezi bufite ireme, ubushakashatsi, n’ubujyanama mu by’ubuhinzi.

RICA kandi ifite uruhare rukomeye mu kuzamura ubuhinzi burambye n’udushya mu Rwanda.

Uruganda rwa Inyange rukora amata y’ifu (Inyange Industries Milk Powder Plant) rwuzuye rutwaye asaga $100 miliyoni z’ amadolari.

Uru ruganda rukoresha ikoranabuhanga rigezweho mu gutunganya amata agahinduka ifu, kandi ni rwo ruganda runini mu Rwanda rukora ifu y’amata, bikaba byitezweho ko ruzinjiza miliyari 10 z’amafaranga y’u Rwanda buri mwaka mu bukungu bw’igihugu, bityo rukazamura igisate cy’ ubworozi bw’ inka.

Umushinga wa Gabiro Agribusiness Hub watwaye $180 miliyoni z’ amadolari.

Uyu mushinga wa Gabiro Agribusiness Hub ni umwe mu mishinga minini y’iterambere ry’ubuhinzi mu Rwanda, ukaba ufite mu nshingano zo gukwirakwiza amazi yo kuhira imyaka ku buso bwa hegitari 15,600.

Ikindi kandi uyu mushinga uzashyigikira ubworozi, imyaka ijya ku isoko mpuzamahanga, n’ibicuruzwa bifite agaciro k’inyongera.

U Rwanda rukomeje gushora amafaranga menshi mu guteza imbere ubuhinzi bwa kijyambere, ubworozi, no kongera agaciro ku musaruro w’abahinzi n’aborozi.

Iyi mishanga ikaba izafasha igihugu kongera umusaruro w’ibiribwa, guteza imbere isoko ryo mu gihugu no hanze, ndetse no kurinda ibidukikije binyuze mu buhinzi burambye.

Ubuhinzi bukomeje kuba inkingi y’iterambere ry’ubukungu bw’u Rwanda, kandi iyi mishinga ni icyitegererezo cy’uburyo igihugu cyashyizemo imbaraga mu kuzamura uru rwego.

Umwanditsi: Bertrand Munyazikwiye