imena news

Blog

  • Basketball: Ikipe y’Igihugu y’Abagore ikomeje imyitozo yo gushaka itike y’Igikombe cy’Isi

    Basketball: Ikipe y’Igihugu y’Abagore ikomeje imyitozo yo gushaka itike y’Igikombe cy’Isi

    kipe y’igihugu y’abagore mu mukino wa Basketball ikomeje imyitozo yitegura imikino y’ijonjora ry’ibanze yo gushaka itike y’Igikombe cy’Isi mu Bagore (FIBA Women’s Basketball World Cup 2026 Pre-Qualifying Tournaments) izabera i Kigali tariki 19-25 Kanama 2024.

    Iyi kipe kandi igizwe n’abakinnyi basanzwe bakina imbere mu gihugu ndetse no hanze y’igihugu, imaze iminsi 10 itangiye Umwiherero.

    Urutonde rw’abakinnyi bahamagawe mu ikipe y’Igihugu y’Abagore

    Uwizeye Assouma, Mwizerwa Faustine, Dusabe Jane, Imanizabayo Laurence, Akaliza Nelly, Tetero Odille, Urwibutso Nicole, Micomyiza Rosine ‘Cisse’, Kantore Sandra, Uwase Shanice, Umugwaneza Charlotte, Destiney Philoxy, Kiyobe Chantal, Joyeuse Sifa Ineza, Celine De Roy, Mugeni Sabine, Soiffa Wibabara, Hope Butera na Murekatete Bella.

    Umukinnyi mushya wiyongereyemo ni Murekatete Bella ukinira Washington State Cougars Women’s Basketball ikina muri Shampiyona ihuza kaminuza zo muri Leta Zunze Ubumwe z’Amerika, (NCAA Division I)

    Murekatete ni umwe mu bakinnyi bakomeye cyane b’Ikipe y’Igihugu ndetse yitabiriye ubutumire bwayo ameze neza kuko uyu mwaka w’imikino wamugendekeye neza.

    Mu mikino 36 yakinnye, yabarirwaga gutsinda amanota 11 ku mukino, azibira inshuro zirindwi.

    Si ibyo gusa kuko uyu mwaka yaciye uduhigo twinshi mu ikipe ye, aho yabashije kuba umukinnyi wa mbere mu mateka wakoze rebounds nyinshi (990), block nyinshi (188), wakinnye imikino myinshi (153) ndetse wanabanje mu kibuga inshuro nyinshi (145).

    Muri rusange, amaze gutsindira Washington State Cougars Women’s Basketball amanota 1,552, bimushyira ku mwanya wa gatanu mu bamaze gutsindira iyi kipe amanota menshi mu mateka yayo.

    Muri uyu mwaka kandi Murekatete yagaragaye mu mukino w’intoranywa za Shampiyona ihuza kaminuza zo muri Leta Zunze Zunze Ubumwe z’Amerika ‘Women’s College All Star Game’.

    Uyu mukinnyi w’imyaka 23 yaherukaga mu Ikipe y’Igihugu mu 2021 mu mikino yo gushaka itike y’Igikombe cya Afurika yabereye muri BK Arena.

    U Rwanda ndetse na Mexique byahawe kwakira imikino y’ijonjora ry’ibanze yo gushaka itike y’Igikombe cy’Isi mu bagore (FIBA Women’s Basketball World Cup 2026 Pre-Qualifying Tournaments) iteganyijwe tariki 19 kugeza 25 Kanama 2024.

    Iyi mikino izitabirwa n’ibihugu 16 bigabanyije mu marushanwa abiri, agabanyijemo amakipe umunani aho rimwe rizabera i Kigali irindi muri Mexique.

    U Rwanda ruzakira imikino y’amatsinda abiri irya C ririmo u Rwanda, u Bwongereza, Argentine na Lebanon ndetse na D ririmo Brésil, Hungary, Sénégal, Philippines.

    Amakipe 16 azitwara neza ni yo azitabira imikino y’Igikombe cy’Isi kizabera mu Bugade tariki 4-13 Nzeri 2026.

    Murekatete Bella (ufite umupira) yaherukaga mu Ikipe y’Igihugu mu 2021
  • M23 na RDC mu mishyikirano i Kampala

    M23 na RDC mu mishyikirano i Kampala

    Leta ya Repubulika Iharanira Demokarasi ya Congo n’umutwe wa M23, kuva kuri uyu wa Mbere tariki ya 22 Nyakanga batangiye ibiganiro by’ibanga bigamije guhosha amakimbirane amaze imyaka irenga ibiri hagati y’impande zombi.

    Ni ibiganiro biri kubera i Kampala muri Uganda ku buhuza bwa Perezida Yoweri Kaguta Museveni na Uhuru Kenyatta wahoze ayobora Kenya, akanaba umuhuza mu bibazo bya Congo.

    Mu babyitabiriye ku ruhande rwa M23 barimo René Abandi wahoze ari umuhuzabikorwa ushinzwe gushyira mu bikorwa amasezerano y’amahoro uyu M23 yari yarasinyanye na Leta ya Congo.

    Abandi wanigeze kuba umuvugizi wa M23, i Kampala ari kumwe n’abarimo Lawrence Kanyuka usanzwe ari umuvugizi w’ishami rya Politiki rya M23.

    Abandi ni Colonel Imani Nzenze uri mu basirikare bakuru ba M23 ndetse n’uwitwa Yannick Kisola.

    Intumwa za Leta ya Congo ku rundi ruhande ziyobowe na Abbé Bahala Okw’Ibale Jean Bosco usanzwe ari umuhuzabikorwa wa gahunda ishinzwe kwambura intwaro imitwe yitwaje intwaro ndetse no gusubiza mu buzima busanzwe abahoze ari abarwanyi bayo (P-DDRCS).

    Uyu wahoze ari umuyobozi w’Inama Nkuru y’Itangazamakuru n’Itumanaho muri RDC, yajyanye i Kampala n’abarimo uwitwa Mutuale Malangu cyo kimwe na Okankwa Bukasa Anselme nk’uko bigaragazwa na ’Ordre de mission’ bahawe na Minisitiri w’Intebe wungirije wa RDC akanaba Minisitiri w’Ingabo ndetse n’abahoze ku rugamba.

    Ni Ordre de mission igaragaza ko misiyo boherejwemo i Kampala igomba kumara iminsi itanu.

    Kinshasa yatangiye ibiganiro rwihishwa na M23, mu gihe yari yararahiye ko nta biganiro izigera na rimwe igirana n’izi nyeshyamba ziyobowe na Gen Sultani Makenga.

    Ibihugu birimo Leta Zunze Ubumwe za Amerika, u Bufaransa, U Bubiligi, u Bwongereza, Uganda yakiriye ibiganiro n’ibindi byinshi ku rundi ruhande byari bimaze igihe bibwira Leta ya RDC ko imishyikirano ari yo nzira yonyine yakemura amakimbirane amaze igihe abera mu burasirazuba bwa RDC.

    Kugeza ubu hashize iminsi mike nta mirwano ihuza impande zombi nyuma y’agahenge k’iminsi 28 katangajwe na Amerika.

    Ni agahenge Washington yatangaje nyuma y’iminsi mike inyeshyamba za M23 zigarurira uduce dutandukanye tw’intara ya Kivu y’Amajyaruguru, turimo nk’imijyi mito ya Kanyabayonga, Kaina, Kirumba ndetse n’uduce twinshi twa Teritwari ya Lubero.

  • Cardi B n’umwe mubashyigikiye Kamala Harris ku mwanya wa Perezida

    Cardi B n’umwe mubashyigikiye Kamala Harris ku mwanya wa Perezida

    Umuraperi w’umunyamerika Cardi B yashyigikiye Visi Perezida Kamala Harris kuba umukandida w’Ishyaka riharanira Demokarasi mu matora y’umukuru wa Leta Zunze Ubumwe z’Amerika.

    Cardi B, wari wavuze mbere ko Harris agomba kuba umukandida w’Ishyaka riharanira Demokarasi nyuma y’impaka za Perezida Joe Biden n’umukandida w’Ishyaka ry’Abarepubulika Donald Trump, yishimiye amakuru avuga ko Biden atazigera yiyamamariza umwanya w’Umukuru w’Igihugu agaragaza ko Kamala Harris wari umwungirije ashoboye.

    Yifashishije imbuga nkoranyambaga ze Cardi B yanditse agira ati: “Nahoze mbivuga ko Kamala Harris agomba kuba umukandida wa 2024, najyaga mbona Donald Trump ari iterabwoba ryigendera, ariko noneho Joe Biden we nasanze ari ugutenguhwa gusa, nkurikije ibyo nabonye muri iyi manda ishize haba mu miyoborere y’imbere mu gihugu ndetse n’ububanyi n’amahanga byari bikwiye ko tubona undi mukandida. Kandi ni Kamala Harris”

    Mu biganiro bitandukanye, Cardi B yakunze kugaragara avuga ko atazitabira amatora yo mu Gushyingo mu gihe abakandida bakomeje kuba Joe Biden, wo mu ishyaka ry’Abademokarate, ndetse n’uwamubanjirije, Donald Trump wo mu ishyaka ry’Abarepubulika.

    Joe Biden wari Perezida wa Leta zunze Ubumwe z’Amerika yatangaje ko atazigera atanga kandidatire mu matora ateganyijwe mu Ugushyingo, ku Cyumweru tariki         21 Nyakanga 2024.

  • Byemejwe burundu ko Paul Kagame yatorewe kuba Perezida n’amajwi 99.18%

    Byemejwe burundu ko Paul Kagame yatorewe kuba Perezida n’amajwi 99.18%

    Kuri uyu wa Mbere tariki ya 22 Nyakanga 2024, Komisiyo y’Igihugu y’Amatora (NEC) yemeje ku buryo bwa burundu ibyavuye mu matora ya Perezida wa Repubulika n’ay’Abadepite yabaye tariki ya 14, 15 na 16 Nyakanga 2024.

    Iyo Komisiyo yemeje ko amajwi ya burundu agaragaza ko Paul Kagame wari watanzwe n’Umuryango FPR Inkotanyi yatsindiye kuyobora u Rwanda agize amajwi 99.18%.

    Iyo Komisiyo yaboneyeho gushimira  Abanyarwanda bose uruhare bagize mu myiteguro, ubwitabire n’imigendekere myiza y’amatora, haba mu Gihugu no mu mahanga.

    By’umwihariko NEC yashimiye Imitwe ya Politiki n’Abakandida bigenga uruhare n’uburyo bitwaye mu bikorwa by’amatora.

    Yakomeje igira iti: “Turashimira kandi abakorerabushake b`amatora n’abafatanyabikorwa bose barimo Inzego z’ibanze, inzego z’umutekano, imiryango itari iya Leta, indorerezi, n’itangazamakuru ku bufatanye bagaragaje mu migendekere myiza y’amatora.”

  • U Rwanda rufite intego yo kuba igicumbi cy’ubuzima mu Karere 

    U Rwanda rufite intego yo kuba igicumbi cy’ubuzima mu Karere 

    Perezida wa Repubulika y’u Rwanda, Paul Kagame, yatangaje ko u Rwanda rufite intego yo kubakira ubushobozi urwego rw’ubuzima ku buryo ruba igicumbi cy’ubuzima mu Karere aho Abanyarwanda n’abatuye Akarere bazabyungukiramo.

    Umukuru w’Igihugu yavuze ko u Rwanda rushyize imbere ku kubakira ubushobozi abaganga ndetse no kubaka ibikorwa remezo bigezweho bituma ubuvuzi butangwa neza.

    Yabigarutseho kuri uyu wa Mbere tariki ya 22 Nyakanga 2023, ubwo yashyiraga ibuye ry’ifatizo ahatangijwe ibikorwa byo kwagura Ibitaro byitiriwe Umwami Faisal biri i Kigali ku Kacyiru.

    Umukuru w’Igihugu yavuze ko buri gihe u Rwanda ruba rushaka kwagura uburyo bwo gutanga serivisi nziza z’ubuzima, ndetse ko ari yo mpamvu rwohereza urubyiruko hanze y’Igihugu kwihugura mu bijyanye no gutanga izo  serisivi, hagamijwe ko ibyo bize baza kubikora mu Rwanda.

    Ati: “Ni yo mpamvu dusaba abantu bagiye kwiga, kugaruka bagatanga serivisi bavuye kwiga, ariko ntabwo twakomeza kohereza abarwayi kwivuriza mu mahanga, ariko abantu mwabohereza kwiga hanze.

    Nubwo hashize imyaka myinshi tubikora, ntabwo twifuza gukomeza twohereza abarwayi kujya kwivuriza hanze y’Igihugu, wohereza abantu bakajya kwigira hanze y’Igihugu bakagaruka ibyo bize bakabyigisha hano, ariko ugakomeza kohereza abarwayi bakajya kwivuza hanze.”

    Umukuru w’Igihugu yavuze ko uko  kuzamura ubushobozi bw’inzego zitandukanye bwiyongera, Abanyarwanda n’abandi baturage bo mu Karere u Rwanda ruherereyemo bazajya babonera sirivisi z’ubuvuzi hano mu Rwanda.

    Ati: “Ibintu byubakirwe hano, igikorwa remezo nk’iki, ndetse n’ubushobozi bwubakwe mu bantu, bashobore gutanga serivisi zikenewe.”

    Umukuru w’Igihugu yashimangiye ko gushaka ko serivisi z’ubuvuzi, abaturage bajya gushaka hanze y’Igihugu bajya bazibonera mu gihugu imbere, ari yo mpamvu u Rwanda rushora imari mu kubaka ibikorwa remezo bigezweho nk’ibi bitaro byitiriwe Umwami Faisal byatangiye kwagurwa.

    Yavuze ko kubakira ubushobozi urwego rw’ubuzima mu Rwanda rugatanga serivisi nziza, hifuzwa ko bitagirira Abanyarwanda akamaro gusa ahubwo n’abo mu Karere u Rwanda rurereyemo bakabyungukiramo.

    Ati: “Bakaza kwivuriza mu Rwanda kubera ko twaba dutanga serivisi nziza bakeneye, nk’uko n’Abanyarwanda bazihabwa”.

    Umukuru w’Igihugu yijeje ko imbogamizi zishobora kubangamira kwagurwa kw’ibyo bitaro byitiriwe Umwami Faisal, azakora uko ashoboye afatanyije na Minisiteri z’Ubuzima (MINISANTE) n’iy’Ibikorwa Remezo (MININFRA) zigakurwaho.

    Yaboneyeho gusaba MININFRA gukemura ibibazo bijyanye n’ibikorwa remezo kuri ibi bitaro, ndetse n’Urwego rw’Ubwiteganyirize (RSSB) arusaba gukemura ibibazo birureba biri aho.

    Perezida Kagame kandi yijeje ubufatanye abagiye kwagura Ibitaro byitiriwe Umwami Faisal ko azakomeza kubafasha kugira ngo ibyo bikorwa bigende neza.

  • Red Arrows yegukanye CECAFA Kagame Cup itsinze APR FC

    Red Arrows yegukanye CECAFA Kagame Cup itsinze APR FC

    Red Arrows yo muri Zambia yegukanye igikombe cya CECAFA Kagame CUP 2024 yaberaga muri Tanzania itsinze APR FC yo mu Rwanda Penaliti 10-9 nyuma kunganya igitego 1-1 mu minota 120 yakinwe. 

    Uyu mukino wabaye kuri iki Cyumweru tariki 21 Nyakanga 2024 kuri KMC Stadium.

    APR FC yageze ku mukino wa nyuma isezeryeye Al AHilal yo muri Sudani iyitsinze Penaliti 5-4 mu gihe Red Arrows yari yasezereye Hay Al Wadi yo muri Sudani ibitego 2-0. 

    Muri uyu mukino, APR FC yatangiye neza umukino isatira izamu Red Arrows harimo uburyo bw’igitego bwabonetse ku munota wa 3 ku mupira mwiza wazamukanywe na Ruboneka Bosco awuha neza Gilbert wari mu rubuga rw’amahina ateye mu izamu Tembo awushyira muri koruneri.

    Iyi koruneri yatewe na Bosco ntacyo itanze.

    Ku munota wa 6 APR FC yongeye guhusha igitego cyabazwe ku mupira wazamukanywe ku ruhande rw’ibumoso na Mugisha Gilbert, awuhinduriye Mbaoma awutera nabi ntiwajya mu izamu.

    Ku munota wa 8 Red Arrows yabonye penaliti  kuri Contre Attaque yakozwe, maze umusifuzi yemeza ko Byiringiro Gilbert yakoze ikosa mu rubuga rw’amahina.

    Iyo penaliti yatewe na Ebengo Ikoko yakuwemo neza n’Umunyezamu wa APR FC Pavel Ndzila. 

    Ku munota wa 21 Red Arrows Red Arrows yaremye uburyo bwo gutsinda ku mupira watanzwe na Allasane Diarra ugeze mu rubuga rw’amahina ariko Dauda atuma utagera kwa Ricky Banda wari wenyine.

    Ku munota wa 29 yongeye kurema uburyo bw’igitego ku mupira wihuta wavuye kwa Ruboneka, Ramadhan awuhaye Mbaoma, ariko uyu awuteye uca hanze gato y’izamu rya Charles.

    Ku munota wa 44 yongeye kubona amahirwe yo gutsinda igitego ku ishoti rikomeye ryatewe na Mugisha Gilbert umupira ukurwamo n’ubwugarizi.

    Igice cya mbere cyarangiye amakipe yombi anganyije ubusa ku busa.

    Mu gice cya kabiri APR FC yatangiranye impinduka Niyibizi Ramadhan aha umwanya Lamptey Richmond.

    Ku munota wa 57 APR FC yashoboraga kubona penaliti ku mupira muremure watewe na Lamptey, usanga Gilbert mu rubuga rw’amahina, awuteye n’umutwe ukora ku kaboko ka myugariro wa Arrows ariko umusifuzi ntiyatanga penaliti. 

    Ku munota wa 60 APR FC yongeye gukora impinduka Mamadou Sy na Nzotanga Fils bafata umwanya wa Victor Mbaoma na Dushimimana Olivier Muzungu.

    Ku munota wa 62 Red Arrows yatsinze igitego cya mbere na Rutahizamu Ricky Banda ku burangare bw’ubwugarizi. 

    Ku munota wa 66 yongeye gusatira ishaka igitego cyo kwishyura ku ishoti rikomeye ryatewe na Nzotanga, Charles awushyize muri koruneri.

    Iyi itewe na Ruboneka ariko ab’inyuma ba Arrows bakiza izamu.

    Ku munota wa 70 Red Arrows yahushije igitego cyabazwe ku mupira wari uvuze muri koruneri, usanga Ricky Banda ari wenyine, awuteye mu izamu, uyu munyezamu aratabara. 

    Iminota 10 ya nyuma y’umukino yihariwe na APR FC yashakaga igitego cyo kwishyura harimo uburyo bwabonetse ku mupira Bosco yaterekeye Clement wagiye mu busatirizi, uyu awuhaye neza Nzotanga wari mu rubuga rw’amahina awuteye ukubita umutambiko w’izamu nanone.

    Mbere y’uko iminota 90 irangira umusifuzi wa kane yongeyeho iminota itanu. 

    Ku munota wa 90+3 APR FC yabonye igitego cyo kwishyura cyatsinzwe na Mamadou Sy, ku mupira mwiza yahawe na Richmond Lamptey, na we acenga myugariro wa Arrows ateye umupira ujya mu nshundura.

    Ku munota wa 90+4 APR FC yashoboraga kubona igitego cya kabiri ku mupira wazamukanywe na Ruboneka Bosc wenyine hagati, ari hafi y’urubuga rw’amahina aterye ishoti rikomeye umunyezamu awushyira muri koruneri.

    Iyi koruneri ntacyo yatanze.

    Umukino warangiye amakipe yombi anganyije igitego 1-1. 

    Hahise hitabazwa iminota 30 y’inyongera kugira ngo hamenyekane uwegukana igikombe.

    Mu gace ka mbere k’iminota y’inyongera ikipe y’Ingabo z’Igihugu bakomereje aho basoreje igice cya kabiri binyuze Lampety na Mamadou Sy.

    Ku munota wa 100, Mamadou Sy yahushije ubundi buryo ku kazi gakomeye kakozwe na Lamptey, Nzotanga agaruye umupira mu rubuga rw’amahina, usanga Mamadou Sy awuteye n’umutwe umupira ujya hanze ariko agira ikibazo agwa nabi.

    Agace ka mbere karangiye amakipe yombi anganyije igitego 1-1. 

    Mu gace ka kabiri amakipe yombi yagarutse yagabanyije imbaraga umupira ukomeza gukinirwa hagati cyane.

    Iminota 30 y’inyogera yarangiye amakipe yombi anganyije igitego 1-1 hahita hitabazwa penaliti.

    Red Arows yo muri Zambia ni yo yegukanye CECAFA Kagame Cup 2024 itsinze APR FC Penaliti 10-9. 

    Penaliti za APR FC zatewe na Ndayishimiye Dieudonne, Niyigena Clement, Kategaya Elie, Byiringiro Gilbert, Mamadou Sy, Aliou Souane, Lamptey Richmond, Dauda Yussif, Claude Niyomugabo na Arsene Tuyisenge wayiteye mu kirere.

    Ni inshuro ya 4 APR FC itsindiwe ku mukino wa nyuma wa CECAFA hanze y’u Rwanda.

    1996 (Tanzania) Simba 1-0 APR FC

    2005 (Uganda) Villa 3-0 APR FC

    2013 (Sudan) Vital’o 2-0 APR FC 

    Mu mukino wo guhatanira umwanya wa gatatu Al Hilal yatsinze Hay Al wadi penaliti 3-2 nyuma yo kunganya igitego 1-1 mu minota 120 yakinwe.

  • Urukiko rwemeje ko Platini n’umugore we nta mwana bafitanye,rwemeza gatanya

    Urukiko rwemeje ko Platini n’umugore we nta mwana bafitanye,rwemeza gatanya

    Urukiko rwemeje gutandukana  burundu ku bwumvikane hagati ya Nemeye Platini na Ingabire Olivia bari barashakanye, runemeza ko bombi nta mwana bafitanye.

    Aba bombi  basabaga Urukiko ko rwakwemeza ubwumvikane bwabo mu gutandukana burundu, rugasesa isezerano bagiranye mu 2021  ubwo  basezeranaga  kubana nk’umugore n’umugabo.

    Ikirego cy’abo bombi cyatanzwe mu  Urukiko rw’Ibanze rwa Nyamata ku wa 11 Mutarama 2024, cyakirwa ku wa 15 Mutarama 2024.

    Platini yatanze ikirego avuga ko muri Werurwe 2021 yagiranye amasezerano y’ugushyingirwa hagati ye na Ingabire Olivia, bagasezeranira mu Murenge wa Remera mu Karere ka Gasabo ariko bakaba bifuza kuyasesa.

    Urukiko rwemeje ubwumvikane bwabo, rwemeza ko batandukanye burundu ndetse rusesa amasezerano bagiranye ndetse rwemeza ko bazandukurwa mu gitabo cy’irangamimerere mu Murenge wa Remera aho bari basezeraniye.

    Urukiko rwemeje  kandi   ko Platini na Ingabire bemeranyije ko nta mwana bafitanye.

    Rwemeje ko umutungo utimukanwwa ugizwe n’ibikoresho byo mu nzu byagabanywe mu bwumvikane.

    Rwemeje ko inzu bari bafitanye mu Karere ka Bugesera iguma ari iya Platini ndetse igomba guhita imwandikwaho wenyine.

    Rwibukije ababuranyi ko ibyo bumvikanye bigomba guhita bishyirwa mu ngiro bahereye umunsi urubanza rwaciriweho ndetse rutegeka ko iki cyemezo gihita gishyirwaho inyandiko mpuruza.

    Ikindi Urukiko rwibukije  ababuranyi ni uko iki cyemezo kitajuririrwa.

  • Amafunguro 10 yakongerera akanyamuneza N’imbaraga umubiri

    Amafunguro 10 yakongerera akanyamuneza N’imbaraga umubiri

    Gufata amafunguro arimo intungamubiri ni kimwe mu by’ingenzi abantu baba bagomba kwitaho ngo bagire ubuzima bwiza ku mubiri no mu mutwe. Guhora ufata amafunguro arimo intungamubiri umubiri ukeneye ku rugero rukwiye bifasha umuntu kumva amerewe neza, ariko hakaba indobanure y’amafunguro yongerera uyafata akanyamuneza n’imbaraga.

    Ni ibiribwa bigizwe na vitamini zihariye zirimo n’imyunyungugu bifite ubushobozi bwo gutanga imbaraga ku mubiri no gutuma havubura imisemburo ituma umererwa neza.

    Muri iyi nkuru turagaruka ku biribwa 10 byafasha umubiri w’umuntu wacitse intege ukagarura imbaraga ndetse n’ubwonko bwe bugakora neza.

     ‘Dark Chocolate’

    Ubushakashatsi bugaragaza ko Chocola ifite ubushobozi bwo kongera umusemburo wa Endorphin ufasha umubiri gusubira mu bihe byiza nk’ibyishimo, kugabanya umunaniro, umuhangayiko n’ibindi.

    Ubwasohotse muri Journal of Psychopharmacology bugaragaza ko abantu babukoreweho barya shokora zijimye bagaragaragaho ibyishimo n’akanyamuneza.

    Imineke

    Umuneke ukungahaye ku ntungamubiri nyinshi zirimo vitamine B6 ifasha mu kuvuburwa kw’imisemburo imwe n’imwe nka dopamine na serotonine igira uruhare kuzamura ibyishimo.

    Umuneke kandi ni rumwe mu mbuto zifite ubushobozi bwo kohereza glucose ikenewe mu maraso bituma uwawuriye ahorana imbaraga.

    Oats

    Kurya iki gihingwa mu masaha ya mu gitondo bitera akanyamuneza. Imyunyungugu gikizeho irimo na Fiber ifasha urwungano ngogozi gukora ku muvuduko uringaniye bitanga imbaraga z’umubiri.

    Ni isoko nziza ya vitamine zo mu bwoko bwa B zihindura ibiribwa byinjiye mu mubiri bikabyara imbaraga umuntu akenera mu buzima bwa buri munsi.

    Ubushakasahtsi bwerekana ko izo mbaraga zituruka muri iki gihingwa benshi barya cyangwa bakakivanga mu bindi binyobwa zituma uwagifashwe agira akanyamuneza.

    Inkeri

    Ubwoko butandukanye bw’inkeri burimo Blueberries, Strawberry, Blackberry, Raspberry bukize kuri antioxidants ikenewe mu mubiri.

    Ubushakashatsi bwatangajwe muri Journal of Nutritional Biochemistry bwavuze ko Antioxidantas ibonekamo ivura ibikomere mu mubiri n’umuhangayiko, agahinda gakabije ndetse n’umunaniro ikanakura uburozi mu mubiri.

    Amafi

    Amafi azwi nka Salmon, Macherel na Sardine akize kuri Omega 3 fatty acide. Intungamubiri ziboneka mu mafi zifasha ubwonko gukora neza zikagabanya ibimenyetso by’agahinda gakabije.

    Ubusesenguzi bwatangajwe muri Translational Psychiatry bwagaragaje ko omega3 fatty acide igabanya ibyago byo kwibasirwa n’ibibazo byo mu mutwe, akaba yifitemo na poroteyine nyinshi zongera imbaraga mu ngingo.

    Ubunyobwa

    Ubunyobwa n’izindi mbuto nk’ibihwagari ni isoko ya poroteyine nyinshi, bikagira Fiber n’izindi vitamini zikora mu buryo butandukanye. Imyunyungugu ibibonekamo ifasha kuringaniza isukari mu mubiri, bituma imbaraga zikwirakwizwa mu mubiri mu buryo buboneye.

    Ikinyabutabire cya magnessium na cyo kiri muri ibi bihingwa gifasha kurema imbaraga kinagira uruhare mu kugabanya ibimenyetso by’agahinda gakabije.

    Imboga rwatsi

    Imboga rwatsi zihagije kuri vitamini nyinshi zirimo na C. Ikinyabutabire cya Fer kibonekamo gifasha mu gukwirakwiza umwuka mwiza mu tunyangingo, bigatuma umunaniro ukagabanyuka.

    Izi mboga zikize kuri folate ifasha ubwonko gukorana neza n’izindi ngingo ndetse no gufasha kugarura akanyamuneza.

    Ibishyimbo n’amashaza

    Amashaza mato, ibishyimbo n’ibindi biri mu muryango umwe biri mu bikungahaye kuri Carbohydrates na fiber.

    Ibi byombi bifasha bimwe mu bice by’umubiri bikomeye nk’impyiko, imitsi y’umutima, ubwonko n’ibindi, bikongerera umubiri imbaraga.

    Ikivuguto

    Ikivuguto gikungahaye kuri protein na calcium byinshi. Ubushakashatsi bwasohotse muri Journal Nutritional Neuroscience bwemeza ko ikivuguto gifite intungamubiri zihangana n’ibimenyetso by’agahinda gakabije no kwiyumva nabi mu mubiri.

    Green Tea

    Icyayi gifite ibara ry’icyatsi kiba cyiganjemo caffeine na L-theanine byongerera umubiri imbaraga mu buryo bwihuse.

    Ubushakashatsi bwasohotse muri American Journal of Clinical Nutrition bugaragaza ko caffeine na L-theanine biri mu cyayi cy’icyatsi bifasha uwumvaga atameze neza akagira akanyamuneza, akanasinzira neza.

  • Ikibuga cy’ingede cya Bugesera: Imirimo y’ibanze nk’aho indege zigwa igeze kuri 85%

    Ikibuga cy’ingede cya Bugesera: Imirimo y’ibanze nk’aho indege zigwa igeze kuri 85%

    Imirimo yo kubaka ibikorwa remezo bitandukanye ku kibuga cy’indege gishya mu Karere ka Bugesera mu Ntara y’Iburasirazuba igeze ku rugero rwa 85%, nk’uko byatangajwe na Aviation Travel and Logistics (ATL).

    Nk’uko byatangajwe na ATL, isosiyete ifitwe na leta ishinzwe ibikorwa bijyanye n’indege no kugenzura imirimo y’ubwubatsi bw’ikibuga cy’indege gishya, icyiciro kiriho kubaka aho taxi ziparika, umuhanda ugwaho indege, uburyo bwo gufata amazi, imiyoboro yo mu butaka, n’ibindi.

    Jules Ndenga uyobora ATL, yatangarije The New Times ko ku gice cya kabiri, biteganijwe ko amasezerano azatangwa muri uyu mwaka.

    Yasobanuye ko igice cya kabiri cy’ubwubatsi kizaba kigizwe no kubaka aho abagenzi bategerereza, ahagenewe imizigo, umunara ugenzura ikirere, n’inyubako z’umutekano, ubuyobozi, n’ibiro.

    Kubaka ikibuga cy’indege mpuzamahanga gishya byari biteganijwe ko bizarangira mu 2026. Icyakora, Ndenga yavuze ko biteganijwe ko imirimo yo kubaka izarangira mu 2027.

    Ati: “Intambwe izakurikiraho ni iyo guhugura abakozi, kugerageza no gutangiza ikibuga cy’indege, no kubona icyemezo kigomba gufata umwaka. Kubera iyo mpamvu, ikibuga cy’indege kizatangira gukora mu 2028 ”

    Ikibuga cy’Indege cya Bugesera biteganyijwe ko kizatwara miliyari 2$, gusa Umuyobozi wa ATL avuga ko igiciro gishobora guhinduka bitewe n’impamvu runaka cyangwa kikaguma aha.

  • M23 Vs FARDC: Amerika yongereye igihe cy’agahenge

    M23 Vs FARDC: Amerika yongereye igihe cy’agahenge

    Leta Zunze Ubumwe za Amerika ku wa Gatatu zatangaje ko zongereye iminsi 15 ku gahenge zasabye Ingabo za Repubulika Iharanira Demokarasi ya Congo n’inyeshyamba zo mu mutwe wa M23.

    Amerika yemeje ayo makuru mu itangazo ryasohowe na Matthew Miller, umuvugizi wa Minisiteri y’Ububanyi n’Amahanga yayo.

    Muri iryo tangazo Washington yasabye impande zihanganye muri RDC ndetse n’abantu batandukanye mu karere kubahiriza kariya gahenge.

    Amerika kandi ivuga ko igikomeje gukorana bya hafi na Guverinoma z’ibihugu bya RDC, u Rwanda na Angola, mu rwego rwo gushyigikira ingufu za dipolomasi zigamije gucubya amakimbirane ya Kigali na Kinshasa biciye muri gahunda y’ibiganiro bya Nairobi na Luanda.

    Ku itariki ya 4 Nyakanga ni bwo Leta Zunze Ubumwe za Amerika zatangaje kariya gahenge, mu rwego rwo gufasha abakora ibikorwa by’ubutabazi kwita ku banye-Congo bavanwe mu byabo n’imirwano.

    Icyakora aka gahenge karanzwe no kwitana ba mwana hagati y’ihuriro ry’ingabo za Leta ya Congo na M23; kuko buri ruhande rwashinje urundi kurenga ku gahenge.

    Amakuru avuga ko mu gihe cy’aka gahenge hari imirwano yasakiranyije impande zombi yasize hari imidugudu yo muri Teritwari ya Masisi inyeshyamba zigaruriye.