Mu Rwanda hatangiye iburanisha ridasanzwe aho abaregwa,ubushinjacyaha n’abacamanza batari kumwe
Kuri uyu wa 9 Mata 2020, mu Rwanda hatangiye kuburanishwa imanza aho aberegwa, abashinjacyaha n’abacamanza batari mu cyumba kimwe, mu rwego rwo kwirinda ikwirakwira rya coronavirus.
Ibikorwa byose uretse ibyangombwa cyane byarahagaritswe mu Rwanda, ubu hagiye gushira ibyumweru bitatu. Imanza nazo zari zarahagaritswe.
Uyu munsi, ku kicaro cya polisi y’umujyi wa Kigali i Remera hari hahurijwe abaregwa bafunze, bicaye bategeranye bambaye amapingu kandi bitegeye insakazamushusho nini imbere yabo.
Barabanaga ku mashusho n’ubushinjacyaha buri ku kicaro cyabwo ku Kimihurura n’abacamanza nabo bari mu cyumba cy’urukiko rw’ikirenga.
Ugezweho mu baregwa akurwaho amapingu akigira imbere y’iyi nsakazamashusho akarebana n’abacamanza n’ubushinjacyaha.
Aba bose b’uyu munsi baraburana ifunga n’ifungurwa ry’agateganyo.
Byabonekaga ko abaregwa byabagoye kumenyera kwisobanura imbere y’insakazamashusho, kuko basaga n’abatabibona nk’urubanza rusanzwe.
Abacamanza bafataga umwanya munini babaza uregwa kugira ngo asubize yumva ko ari gusubiza urukiko.
Muri iri buranisha rya none nta bunganira abaregwa bagaragaye. Iri buranisha ridasanzwe mu Rwanda ryatangiriye mu rukiko rw’ibanze rwa Gasabo.
Harrison Mutabazi, umuvugizi w’inkiko mu Rwanda yatangaje ko ibi ari igerageza rya mbere rishobora gukomereza n’ahandi mu gihugu.
Bwana Mutabazi avuga ko ibi bigamije kugabanya ubwinshi bw’imanza buri kwirundanya mu nkiko muri ibi bihe bidasanzwe, no kwihutisha ubutabera.
Atanga urugero ko, nko mu karere ka Kicukiro honyine ubu hari imanza 150 z’ifunga n’ifungurwa ry’agateganyo zitegereje kuburanishwa.
Mu cyumweru gishize, ubushinjacyaha bw’u Rwanda bwatangaje ko buri kurekura by’agateganyo bamwe mu bafungiye kuri sitasiyo za polisi baregwa ibyaha byoroheje.
Bwavuze ko ibi bigamije kwirinda ubucucike n’ikwirakwira ry’iki cyorezo.
