Ethiopia yashyizeho impapuro zo gufata abasirikare bakuru bacyekwaho gukorana na Tigray
Leta ya Ethiopia yashyizeho impapuro zo guta muri yombi abasirikare bakuru 76 ishinja gukorana n’umutwe w’ingabo zishamikiye ku ishyaka Tigray People’s Liberation Front (TPLF).
Ingabo z’iryo shyaka zirimo kurwana n’ingabo z’igihugu cya Ethiopia muri leta ya Tigray – imwe mu zigize iki gihugu.
Minisitiri w’intebe wa Ethiopia Abiy Ahmed yavuze ko ingabo ze zikataje zerekeza mu murwa mukuru Mekelle wa Tigray.
Amakuru avuga ko abantu babarirwa mu magana bamaze gupfira muri iyo mirwano, naho ababarirwa mu bihumbi na mirongo bo bamaze guhunga nyuma y’ibyumweru bigera kuri bibiri haba imirwano.
Kugenzura amakuru ava muri Tigray biragoye kuko bwinshi mu buryo bw’itumanaho butagikora.
Iyi mirwano ifite imizi mu bushyamirane bumaze igihe hagati y’ishyaka rikomeye rya TPLF riri ku butegetsi muri ako karere ndetse na leta ya Ethiopia ifite icyicaro mu murwa mukuru Addis Abeba.
Ubwo mu kwezi kwa gatandatu Bwana Abiy yasubikaga amatora yo ku rwego rw’igihugu kubera coronavirus, ubushyamirane bwafashe indi ntera hagati y’impande zombi.
TPLF ibona leta ya Ethiopia nk’itemewe n’amategeko, ivuga ko Bwana Abiy igihe cye cyo kuba ku butegetsi cyarangiye.
Leta ya Ethiopia ishinja TPLF kugaba igitero ku kigo cy’ingabo zayo igiye kwiba intwaro, ibyo TPLF yahakanye. Ku bw’ibyo, Bwana Abiy yategetse igitero cya gisirikare kuri TPLF, ayishinja ubugambanyi.
Amakuru mashya ni ayahe?
Ejo ku wa gatatu, polisi ya Ethiopia yatangaje ko yashyizeho impapuro zo guta muri yombi abasirikare bakuru 76.
Barimo ba Jenerali Majoro bane na ba Brigadiye Jenerali 10, bashinjwa gukorana na TPLF mu kugaba igitero ku kigo cya gisirikare.
Leta ya Ethiopia yavuze ko icyo gitero ari cyo cyabaye intandaro y’iyi mirwano ikomeje kuba muri leta ya Tigray.
Bamwe muri bo bari mu kiruhuko cy’izabukuru, ariko abandi baracyari mu ngabo za Ethiopia. Ntibiramenyekana niba bari muri iyi mirwano.
Mu cyumweru gishize, leta ya Ethiopia yanashyizeho impapuro zo guta muri yombi abategetsi bakuru ba TPLF.
Aganira na BBC, Billene Seyoum – umuvugizi wa Minisitiri w’intebe Abiy Ahmed – yahakanye amakuru yuko abanya-Tigray aho bari hose mu gihugu barimo gutabwa muri yombi kubera ubwoko bwabo.
Ariko yemeye ko benshi bafunzwe kubera kuba abanyamuryango b’ibyo yise ibico by’abagizi ba nabi.
Ibi bibaye nyuma yuko ingabo za leta zifashe imijyi ya Shire na Axum.
Ku wa kabiri, igihe ntarengwa cy’iminsi itatu cyari cyatanzwe na Bwana Abiy ku ngabo za Tigray cyarenze zitamanitse amaboko.
Debretsion Gebremichael, ukuriye TPLF, wavukiye mu mujyi wa Shire, yemeje kuri televiziyo yo muri Tigray ko abasirikare be batakaje imijyi ibiri mu majyepfo no mu burengerazuba bwa Tigray.
Ariko, yavuze ko intsinzi y’ingabo za Ethiopia izamara igihe gito, asezeranya gutsinda ingabo za Bwana Abiy.
Sudan ivuga ko abantu bagera ku 36,000 ari bo kugeza ubu bahunze imirwano berekeza muri icyo gihugu bambutse umupaka ihana na Tigray.
