-COVID-19: Akarere ka Nyamagabe kahagaritse kwakira ibibazo by’abaturage

Mu rwego rwo kwirinda ikwirakwira rya COVID-19, Ubuyobozi bw’Akarere ka Nyamagabe buramenyesha abaturage ko bubaye buhagaritse igikorwa cyo kwakira ibibazo by’abaturage ku rwego rw’Akarere.

Mu itangazo aka karere kasohoye, rivuga ko ibibazo by’abaturage bizajya byakirwa ku rwego rw’umurenge gusa ko hari ugize ikibazo yahamagara ku karere bakamugira inama.

Ibi bije kandi mu gihe tariki 16 Nyakanga 2020 mu Biitaro bya Kigeme biherereye mu Karere ka Nyamagabe hagaragaye umuganga n’umuforomo banduye icyorezo cya COVID-19.

Abaturage barasabwa gukomeza kwirinda ingendo zitari ngombwa kugira ngo birinde ikwirakwira rya COVID-19.

Mu Rwanda abamaze kwandura COVID-19 ari 1629, muri bo 838 baravuwe barakira, batanu barapfa. Ibi bivuze ko abakivurwa ari abarwayi 786.