Abanyamakuru ba BBC barekuwe by’agateganyo muri Uganda

BBC yemeje ko abanyamakuru bayo bari batawe muri yombi muri Uganda barekuwe by’agateganyo.

Ikinyamakuru The New Vision kibogamiye kuri leta ya Uganda, cyatangaje ko polisi y’iki gihugu yabarekuye by’agateganyo mu gitondo cyo kuri uyu wa gatanu, bakaba bategetswe kuzitaba ku biro bya polisi ku itariki ya 18 y’uku kwezi kwa kabiri.

Ku wa gatatu nijoro nibwo polisi ya Uganda yari yataye muri yombi iri tsinda ry’abanyamakuru ba BBC, mu murwa mukuru Kampala.

Aba banyamakuru barimo bakora iperereza ku icuruzwa ry’imiti ya leta mu buryo bunyuranyije n’amategeko.

Mbere y’iri rekurwa ry’agateganyo, ibiro ntaramakuru Reuters byari byasubiyemo amagambo ya Ofwono Opondo, umuvugizi wa leta ya Uganda, avuga ko yasabye ko iri tsinda ry’aba banyamakuru barekurwa “nta yandi mananiza”.

Bwana Opondo yabwiye Reuters ati: “Sindiyumvisha impamvu yatumye polisi ita muri yombi aba banyamakuru, ku bwanjye bari bari gufasha leta gutahura imungu iri muri leta”.

Yongeyeho ati: “Bakwiye kurekurwa nta yandi mananiza”.