Ibiganiro Hagati y’u Rwanda na Kongo Byongeye Gusubikwa

Ibiganiro byari biteganyijwe kuba hagati ya Perezida Paul Kagame w’u Rwanda, Félix Tshisekedi wa Repubulika Iharanira Demokarasi ya Kongo (DRC), na João Lourenço wa Angola nk’umuhuza, byasubitswe ku munota wa nyuma kubera ibibazo bitoroshye bikigaragara ku ruhande rwa Kongo. U Rwanda rwavuze ko kudashyira mu bikorwa imyanzuro y’ibiganiro by’abaminisitiri b’ububanyi n’amahanga b’ibihugu byombi, byabaye tariki ya 14 Ukuboza 2024, byatumye iyi nama itaba.

U Rwanda ruvuga ko ikibazo gikomeye ari uko DRC ikomeje kwanga kuganira n’umutwe wa M23 nk’uko byari byemejwe ko ari inzira yo kubona igisubizo cya politiki ku bibazo byo mu burasirazuba bwa Kongo. Kuba kandi ubuyobozi bwa Tshisekedi bukomeje gukoresha imitwe yitwaje intwaro nka FDLR na Wazalendo ndetse n’abacanshuro b’i Burayi no mu karere, bishinjwa kuba bigamije guhungabanya umutekano, nabyo ni inzitizi zigaragara.

U Rwanda rwasobanuye ko Kongo igomba gufata inshingano zo gukemura ibibazo byayo by’imbere aho gukomeza kugira u Rwanda urwitwazo mu kibazo cya M23 n’umutekano muke mu burasirazuba bwa DRC.

Leta y’u Rwanda yanatangaje ko ihora yiteguye kwitabira ibiganiro bigamije uburyo burambye bwo gukemura ibibazo by’umutekano, ariko isaba ko haba uburyo bufatika burimo ibindi bihugu birebwa n’ikibazo.

Itangazo ryashyizwe ahagaragara na Leta y’u Rwanda ryagaragaje ko kudashyira mu bikorwa amasezerano y’amahoro no kwirinda imvugo z’amacakubiri zirebana n’u Rwanda ari byo byatumye ibiganiro bisubikwa. U Rwanda ruvuga ko abahuza João Lourenço na Uhuru Kenyatta bafite inshingano zo gushimangira ko amasezerano yo kuganira n’imitwe yitwaje intwaro yubahirizwa.

U Rwanda rwagaragaje ko kubaho kw’ibiganiro hagati ya Kongo na M23 byashyiraho umusingi ukomeye wo kubona amahoro arambye mu karere. Rwanashimangiye ko impande zose zirebwa n’ibi bibazo, harimo ibihugu bigize EAC na SADC, bigomba kugira uruhare mu gushyigikira ibiganiro bihuriweho no kugera ku mahoro arambye mu burasirazuba bwa Kongo.

Isubikwa ry’ibi biganiro rigaragaza ko hakiri inzitizi zikomeye mu nzira y’amahoro hagati y’u Rwanda na Kongo. Icyakora, impande zose zisabwa kwerekana ubushake bwa politiki no gukurikiza amasezerano agamije gushyira iherezo ku bibazo bimaze imyaka myinshi bihungabanya umutekano w’akarere.

Umwanditsi: Bertrand Munyazikwiiye