Umutekano wakajijwe muri Washington nyuma y’urupfu rw’abasirikare

Washington DC   Umurwa mukuru wa Leta Zunze Ubumwe za Amerika wongeye gucura  umuborogo n’amarira n’impungenge ku wa Gatatu ubwo abasirikare babiri ba National Guard baraswaga n’abantu bataramenyekana.

Iki gikorwa cyahise cyitiriwe n’ubuyobozi bukuru bw’igihugu “igikorwa cy’iterabwoba.”

Amashusho ya Al Jazeera yerekana neza uko inzego z’umutekano zahise zifunga  ako gace, zishyiraho imigozi yo kubuza abantu kwegera (“Police Line – Do Not Cross”) ndetse abapolisi bambaye imyambaro y’akazi bahagaze mu myanya itandukanye, bacunga umutekano mu buryo bukomeye.

Imihanda myinshi yo muri downtown Washington DC yarafunzwe mu rwego rwo guha abagenzacyaha umwanya wo gukora iperereza ryimbitse. Amashusho agaragaramo imodoka nyinshi za polisi, za SWAT, ndetse n’izindi modoka zifashishwa mu gukora iperereza zose zerekana ko iki gikorwa cyafashe igihe’ikirekire kandi gishyira igihugu mu bibazo bikomeye.

Abapolisi babonetse bahagaze mu matsinda, bamwe bafite ibikoresho byihariye by’iperereza, abandi bacunga umutekano ku baturage, mu rwego rwo kwirinda ko hagira ikindi gikorwa cy’urugomo cyakongera kuba.

Muri ayo masaha, Perezida Donald Trump yatanze ubutumwa bwihuse bwanyujijwe kuri televiziyo, aho yavuze ko:”

Iyi mirwano yahitanye abasirikare bacu babiri ni igikorwa cy’iterabwoba .Abakoze ibi bazashakishwa kuge.”

Yongeyeho ko igihugu kidashobora kwihanganira ibikorwa bigamije gukoma mu nkokora inzego z’umutekano ndetse no guca intege National Guard isanzwe ifasha mu bikorwa byo kugarura amahoro mu bice bitandukanye.

umunyamakuru wa Al Jazeera wari uhagaze hafi ya White House yasobanuye uko iki gikorwa cyagize ingaruka ku mutekano w’igihugu. Yavuze ko inzego zishinzwe umutekano zakajije ingamba mu bice bikikije White House, kandi ko amakuru mashya agenda aboneka mu iperereza aheruka kuri  kamera z’umutekano zagaragaje imodoka nyinshi zagiye zihunga nyuma y’amasasu yumvikanye.

Inzego z’umutekano n’iperereza za FBI zasabye abaturage gutanga amakuru yose yaba afite aho ahuriye n’iki gikorwa. Abaturage kandi basabwe kwirinda kwegera aho byabereye no gukurikiza amabwiriza yatanzwe, mu rwego rwo kwirinda ko hari abashobora kugirwaho ingaruka.

Kugeza ubu, nta muntu urafatwa nk’ukekwa, ariko inzego zishinzwe iperereza zatangaje ko hari ibimenyetso byinshi biri gukusanywa bishobora gufasha kumenya intandaro y’iki gikorwa.

Abatuye Washington DC bakomeje kugaragaza impungenge n’intera iri guterwa n’ibikorwa by’urugomo bishobora kuba bifitanye isano n’imitwe ikora iterabwoba. Bamwe mu baturage bavuga ko bumvise amasasu menshi yikurikiranya, abandi bakavuga ko babonye uburyo abapolisi bakomatanyije imbaraga mu minota mikeya cyane.

By: Florence Uwamaliya