Ubwoko bushya bwa Coronavirus bwageze muri Nigeria
Impungenge zikomeje kwiyongera hirya no hino ku Isi nyuma y’uko ubwandu bushya bw’agakoko ka Coronavirus bwatangiye gukwirakwira kandi mu buryo bwihuse.
Nyuma yo kugaragara mu bihugu birimo u Bwongereza na Afurika y’Epfo, aka gakoko kamaze kugera no muri Nigeria, ahagaragaye imibare myinshi y’bwandu bushya bwa Coronavirus kuva iki cyorezo cyagera kuri uyu mugabane.
Ikigo gishinzwe gukumira Ibyorezo ku Mugabane wa Afurika (CDC) cyatangaje ko ubwiyongere bw’imibare y’ubwandu bwa Coronavirus mu bihugu bya Afurika y’Epfo na Nigeria ifitanye isano n’ubu bwoko bushya bwa Coronavirus buri kuvumburwa.
Ubu bwiyongere bwageze ku kigero cya 52% muri Nigeria mu byumweru bine bishize, mu gihe bwageze kuri 40% muri Afurika y’Epfo.
CDC ivuga ko itaramenya byinshi kuri ubu bwandu bushya ndetse ko ikiri gukora amasuzuma agamije kureba amakuru abwerekeye.
Iki kigo cyemeje ko “Afurika ikwiriye kwitwararika birushijeho” kuko bitagenze gutyo ishobora kubona ubwandu bwinshi ku kigero gikabije, nyamara umugabane wari waragerageje guhangana na Coronavirus.
Afurika imaze kugira abantu miliyoni 2.5 banduye Coronavirus, bingana na 3.3% gusa by’abayanduye ku Isi yose.
Muri rusange, ubwiyongere bwa Coronavirus muri Afurika bwageze ku kigero cya 10.9% mu byumweru bine bishize, gusa CDC ikavuga ko ibi bitazaba intandaro yo kudatanga urukingo rwa Coronavirus, ‘kuko bigoye ko ubu bwoko bushya bwa Coronavirus bwakwanga gukorana n’inkingo ziri gukorwa’.
