U Burusiya bwahakanye guha Abanyakenya ’visa’ ngo baburwanirire muri Ukraine
Ambasade y’u Burusiya muri Kenya yatangaje ko itigeze iha Abanya-Kenya ’visa’ kugira ngo bajye kwifatanya n’Abarusiya mu ntambara yo muri Ukraine, isobanura ko abatanze aya makuru bari mu bukangurambaga bushingiye ku kinyoma.
Raporo ihuriweho y’urwego rwa Kenya rushinzwe ubugenzacyaha (DCI) n’urw’ubutasi (NIS) igaragaza ko Abanyakenya barenga 1000 bari kurwanira u Burusiya mu ntambara yo muri Ukraine.
Iyi raporo yagejejwe ku Nteko Ishinga Amategeko ku wa 18 Gashyantare 2026, igaragaza ko bamwe mu bakozi bo mu rwego rw’abinjira n’abasohoka n’urushinzwe umurimo, bafashije Abanyakenya kunyura ku kibuga cy’indege nta nkomyi.
Abakozi bo kuri za ambasade zirimo iy’u Burusiya i Nairobi n’iya Kenya i Moscow bagize uruhare mu guha ’visa’ aba Banya-Kenya no kubafasha kuva mu gihugu mbere yo kwinjizwa mu gisirikare kugira ngo bategurirwe urugamba, nk’uko raporo ikomeza ibivuga.
Ivuga ko Abanyakenya bajyanywe i Moscow, basezeranyijwe akazi keza gahemba Amashilingi 350.000, agahimbazamusyi kagera ku Mashilingi miliyoni 1,2 n’ubwenegihugu bw’u Burusiya, ariko ko bakigerayo, bahise boherezwa mu bigo bya gisirikare, bahabwa imyitozo y’igihe gito.
Kuri uyu wa 19 Gashyantare 2026, Ambasade y’u Burusiya yatangaje ko amakuru yose avuga ko yagize uruhare mu gufasha Abanyakenya kujya i Moscow bagakomereza ku rugamba, ari ibinyoma bibi cyane kandi bigamije kuyobya abantu.
Yagize iti “Nta gihe muri iki kibazo cya Ukraine, Ambasade iraha Abanya-Kenya visa kugira ngo bajye mu Burusiya, bafite intego yo kugira uruhare mu bikorwa bya gisirikare byihariye.”
Iyi Ambasade yasobanuye ko ku Banya-Kenya bari i Moscow, byari amahitamo yabo kwinjira mu gisirikare cy’u Burusiya kubera ko amategeko y’iki gihugu yemerera umunyamahanga kujya mu gisirikare ku bushake.
Iti “Bigomba kumvikana ko itegeko ry’u Burusiya ritabuza abanyamahanga kwinjira ku bushake mu gisirikare cyabwo, mu gihe baba bari mu Burusiya mu buryo bwemewe n’amategeko, banahisemo kugira uruhare mu kurwanya na Ukraine igendera ku matwara y’Abanazi, ishyigikiwe na NATO.”
Hari Abanyakenya bageze ku rugamba, bafatwa n’ingabo za Ukraine. Minisitiri w’Intebe akaba na Minisitiri w’Ububanyi n’Amahanga wa Kenya, Musalia Mudavadi, aherutse gutangaza ko abenegihugu 27 bafashwe ari bo bamaze gucyurwa.
Minisitiri Mudavadi yagaragaje ko ikibazo cy’Abanya-Kenya bajyanwa mu ntambara yo muri Ukraine ari cyo gitotsi cyabaye mu mateka y’umubano mwiza w’igihugu cyabo n’u Burusiya, ateguza ko hazaba ibiganiro bigamije kugikemura binyuze mu mavugurura mu itangwa ry’akazi.
Abanyakenya n’abandi Banyafurika benshi bavuga ko bisanze mu ntambara yo muri Ukraine bitunguranye
