Sri Lanka: Hatowe Perezida mushya uri mu bari banzwe n’abaturage
Abagize inteko ishinga amategeko ba Sri Lanka batoye Minisitiri w’Intebe,Ranil Wickremesinghe nka prezida mushya w’icyo gihugu ariko n’umwe mu bazwe cyane n’abaturage
Wickremesinghe ahanganye n’ikibazo cyo kuyobora igihugu kigeze ahrindimuka mu bukungu no gusubiza ibintu mu buryo nyuma y’amezi n’amezi y’imyigaragambyo y’urudaca.
Yatsinze bikomeye uwo bari bahanganye mu matora, Dullus Alahapperuma, ku majwi 134 kuri 82 mu matora yo mu nteko.
Uwahoze ayobora igihugu cya Sri Lanka Gotabaya Rajapaksa yahunze igihugu mu cyumweru gishize.
Yahungiye mu birwa bya Maldives hanyuma ahita ajya muri Singapore nyuma y’aho abari mu myigaragambyo batereye ibiro bye n’izindi nyubako za leta, bamuhamagarira kwegura.
Banahamagariye kandi Minisitiri w’Intebe Wickremesinghe, usanwe afitaniye ubucuti bukomeye n’umuryango w’uyu wari Perezida, Rajapaksa.Yari yashyizwe muri uwo mwanya mu kwezi kwa gatanu.
Abari mu myigaragambyo batwitse inzu ye mu cyumweru gishize banagaba igitero ku biro bya Minisitiri w’Intebe i Colombo mu kwamagana ubutegetsi bwe.
Abantu muri Sri Lanka bamaze amezi n’amezi bari mu myigaragambyo kubera igihugu kiri mu bukene bukomeye,kikaba gihanganye n’ikibazo c’ibura ry’ibyokurya,ibikomoka kuri peteroli,hamwe n’ibindi bintu by’ingenzi.
Nyuma yo gutorwa, Wickremesinghe yabwiye inteko ishinga amategeko ko igihugu cyari “mu bihe bigoye cyane” kandi ko hari ” Ibibazo bikomeye byo gushakira umuti”.
Uwo mugabo w’imyaka 73 yahamagariye abo batavuga rumwe gukorana na leta ye ku neza y’igihugu.
Byitezwe ko itorwa rye rishobora kugarura ituze muri politike, kugira ngo icyo gihugu gisubire mu biganiro n’ikigega cy’isi yose FMI (International Monetary Fund) kibahe inguanyo.
Ishyaka riri ku butegetsi muri Sri Lanka, Podujana Peramnua, rivuga ko benshi mu barwanashyaka baryo bashyigikiye Wickremesinghe kubera icyizere bamufitiye ku byerekeye ubukungu.
Uyu mugabo w’umunyamategeko, Wickremesinghe, amaze kuba Minisitiri w’Intebe inshuro 6, akaba amaze muri politike ya Sri Lanka imyaka 45.
