M23 yavuye mu bice byinshi yari yarafashe muri Rutshuru
Umutwe wa M23, ku cyumweru tariki ya 15 Mutarama 2023, yavuye muri tumwe mu duce yagenzuraga muri Teritwari ya Rutshuru mu Ntara ya Kivu ya Ruguru.
M23 yavuye muri Nyamilima, Buramba na Kisharo ndetse ngo utu duce yiteguye kudushyikiriza ku mugaragaro EACF.
Radio Okapi yatangaje ko uwo munsi hagaragaye ingabo zitandukanye za M23 ziva mu duce zari zimazemo igihe, mu rwego rwo kubahiriza ibyo uwo mutwe wasabwe mu myanzuro yafatiwe i Luanda muri Angola n’abayobozi bakuru b’ibihugu byo mu karere..
Okapi yatangaje ko kuva muri Rutshuru byatangiriye mu Burasirazuba bw’agace ka Kiwanja nk’uko abaturage baho babibwiye iki gitangazamakuru cy’ishami ry’umuryango w’Abibumbye MONUSCO.
Tariki ya 15 Mutarama 2023, yari yahawe M23 nk’ igihe ntarengwa cyo kuba yavuye mu duce yari yarafashe dutandukanye two muri Rutshuru na Nyiragongo na Masisi mu rwego rwo kugira ngo basubire mu birindiro bahozemo muri Sabyinyo na Chanzu.
Abaturiye Kiwanja kimwe na sosiyeye sivile bavuga ko babonye umurongo w’inyeshyamba za M23 bikoreye amasasu n’ibindi bikoresho.
M23 iri kuva mu duce yirukanyemo ingabo za Leta mu rwego rwo kubahiriza ibyo yasabwe n’amasezerano ya Luanda no kwerekana ko ishaka amahoro arambye mu burasirazuba bwa Congo.
