Kenya: Abapolisi 8 baturikanwe n’igisasu
Abapolisi umunani ba Kenya bapfiriye mu modoka barimo,yaturikijwe n’igisasu cyatezwe mu muhanda hafi y’umupaka wa Kenya na Somalia bari mu kazi kabo ko gucunga umutekano.
Iyi modoka yari itwaye abapolisi 11, yakandagiye iki gisasu cyari gitezwe mu muhanda ihita iturika ubwo yari mu karere ka Wajir muri Kenya.
Umuyobozi wa polisi ya Kenya, Hillary Mutyambai, yatangaje ko abo bapolisi bapfuye bari mu bikorwa byo kurinda umupaka,ariko ngo hahise hashyirwa ingabo nyinshi zirwanira kubutaka n’izo mu kirere.
Abayobozi ba polisi muri Kenya babwiye AFP ko bakeka ko umutwe wa Al-Shabab ariwo nyirabayazana w’iki gitero cyane ko basanzwe barwanya ubutegetsi bwa Somalia n’ibihugu bibushigikiye, harimo na Kenya.
