Imfungwa yo muri Arabie Saoudite ‘yishwe inyonzwe maze irabambwa’
Imfungwa yo muri Arabie Saoudite yaregwaga iterabwoba yishwe maze irabambwa nkuko bivugwa n’igitangazamakuru cya leta y’iki gihugu.
Uyu mugabo wabambwe yari umwe muri 37 na bo bishwe baregwaga ibyaha bimwe.
Muri iki gihugu, abahawe igihano cyo gupfa bacibwa imitwe. Kubambwa nyuma yo kwicwa bikorerwa abo abategetsi babona nk’abakoze ibyaha bikomeye.
Itangazo rya leta rivuga ko aba bagabo bashinjwa “ingengabitekerezo y’ubuhezanguni mu iterabwoba, kurema imitwe y’abaterabwoba no guhungabanya umutekano n’ituze rya rubanda”.
Nkuko bivugwa n’umuryango Amnesty International uharanira uburenganzira bwa muntu, umwe mu bishwe bazira ibi byaha ni umusore wari ufite imyaka 16 y’amavuko ubwo bafatwaga.
Abishwe ku munsi w’ejo ku wa kabiri, barezwe gutera icyicaro cy’abashinzwe umutekano no kwica bamwe mu basirikare, nkuko bikubiye mu itangazo rya leta ya Arabie Saoudite.
Kwica aba bantu byakorewe ahantu hanyuranye harimo no mu murwa mukuru Riyadh n’imijyi izwi nka Maka (Mecca) na Madina (Medina).
Igitangazamakuru Bloomberg kivuga ko muri iki gihugu, umwaka ushize hari undi mugabo wishwe maze arabambwa ashinjwa gushaka gusambanya umugore ku ngufu nyuma akamwica amuteye icyuma.
Leta ya Arabie Saoudite ntijya itangaza imibare y’abahawe igihano cyo gupfa, ariko ibitangazamakuru bya leta bikunze gutangaza inkuru z’abahawe iki gihano.
Amnesty International ivuga ko abantu 104 bamaze guhabwa iki gihano uyu mwaka, mu gihe mu mwaka ushize abantu 149 ari bo bishwe bahawe iki igihano.
Ku cyumweru gishize, leta y’iki gihugu yatangaje ko yaburijemo igitero cyari kugabwa ku biro by’abashinzwe umutekano by’ahitwa al-Zulfi, mu majyaruguru ya Riyadh.
Abantu bane bashinjwa ko bari gukora iki gitero bahise bicwa nk’igihano, nkuko byatangajwe n’umuvugizi w’urwego rw’umutekano.
