COVID-19: Nta murwayi mushya watahuwe mu Rwanda, hakize 4
Imibare y’abakira icyorezo cya Koronavirusi (COVID-19) mu Rwanda ikomeje kwiyongera mu gihe abarwayi bashya batahurwa bagenda bagabanyuka, bikaba bitanga ikizere cy’umusaruro mwiza watanzwe n’ingamba zo kwirinda ikwirakwizwa ryacyo mu Gihugu.
Minisiteri y’Ubuzima yatangaje ko kuri uyu wa Kane tariki ya 14 Gicurasi 2020, nta murwayi n’umwe wa COVID-19 watahuwe mu bipimo 895 byafashwe mu masaha 24 ashize, abamaze gutahurwaho uburwayi bose bakaba bagumye kuri 287.
Abarwayi babamaze gukira mu Rwanda bageze ku 168 aho uyu munsi hakize bane bashya, mu gihe abakirimo kwitabwaho n’abaganga bo babaye 119.
Imibare y’abarwayi bashya iheruka kujya hejuru cyane tariki ya 24 Mata ubwo hatahurwaga 22 barimo abinjiranye iyo ndwara 15 na 7 bahuye na bo, na tariki ya 30 Mata hatahuwe abarwayi 18 bose bavuye hanze y’Igihugu. Icyo gihe ni na bwo byavugwaga ko ubwiganze bw’abatahurwa buri mu bashoferi bw’amakamyo n’abo bakorana.
Minisiteri y’Ubuzima ivuga ko abarwayi ba COVID-19 bamaze gutahurwa babonetse mu bipimo 45,140 bimaze gufatwa kugeza ubu. Hakomeje gukorwa isuzuma mu Gihugu no gutahurwa ababa barahuye n’abarwayi bashya.
Iyo Minisiteri itangaza ko kugeza ubu nta barwayi bashya bakurwa mu Gihugu imbere, kuko abatangazwa bashya baba baturutse hanze yacyo.
Kugeza ubu ntawurabikwa mu Rwanda ko yishwe n’icyorezo cya COVID-19, ndetse n’umurwayi wa mbere wongerewe umwuka yarakize anasezererwa mu bitaro.
Mu gihe guhera ku wa Mbere tariki ya 04 Gicurasi 2020 imirimo imwe n’imwe y’ubuzima busanzwe yasubukuwe, Abaturarwanda barasabwa kurushaho kubahiriza amabwiriza yo kwirinda ari yo gusiga intera ya metero, kwambara udupfukamunwa no gukaraba intoki kenshi bakoresheje amazi meza n’isabune cyangwa alukoro yabugenewe.
Imibare yatangajwe uyu munsi ku rwego mpuzamahanga yerekana ko muri Afurika abamaze kwandura COVID-19 ari 73,176 barimo 25,462 bakize n’abandi 2,496 bahitanywe na cyo. Abamaze kwandura ku Isi bangana na 4,490,147 barimo abakize 1,689,907 n’abapfuye 301,426. Bivuze ko abakirimo kwitabwaho n’abaganga ku Isi bangana na 2,498,814.
