Burundi:Abantu 2000 bavanywe mu kato bari barashyizwemo kubera coronavirus
U Burundi bwarekuye abantu 2,261 bari barashyizwe mu kato kubera coronavirus, nyuma yo gusanga nta bimenyetso byayo bafite.
Minisitiri w’Ubuzima, Thaddée Ndikumana yavuze ko abarekuwe bose nta bimenyetso bya coronavirus bafite. Ntabwo yasobanuye niba bose barabanje gusuzumwa.
Minisitiri Ndikumana yavuze ko abantu 675 bazaguma mu kato.
Kugeza ubu abantu batatu mu Burundi nibo bamaze kwemezwa ko barwaye coronavirus. U Burundi bwatangaje ko abantu 34 bari barahuye n’abo batatu banduye basanze bo batarwaye coronavirus.
U Burundi ntabwo burahagarika urujya n’uruza imbere mu gihugu ariko abinjira mu gihugu bavuye hanze bo basabwa kujya mu kato k’iminsi 14.
