Amerika igiye kwemeza urukingo rwa Novavax rwa Covid-19 ku bantu bakuze
Abajyanama b’ikigo gishinzwe imiti n’ibiribwa muri Leta zunze Ubumwe za Amerika (FDA), bashigikiye cyane ko urukingo rwa Novavax ruhabwa uruhushya rwo gukoreshwa mu gukingira Covid-19 abantu bakuze.
Inteko y’aba bajyanama kuri uyu wa Kabiri yashyigikiye uru rukingo ku majwi 21 hifata umwe gusa, basaba ko Novavax yakoreshwa ku bantu bafite imyaka 18 kuzamura. Rwakozwe n’ikigo Serum Institute cyo mu Buhinde.
FDA niyo isigaje gufata icyemezo cyo kwemeza Novavax nk’urukingo rwa kane rwa Covid-19 muri Amerika rw’abantu bakuze.
Umuyobozi ushinzwe ubucuruzi muri Novavax, John Trizzino, yavuze ko bizeye ko uru rukingo ruzaba rwageze mu bubiko bwabo muri Amerika mu mpera z’uku kwezi. Yavuze ko biteguye kugeza za miliyoni z’inkingo muri Amerika igihe cyose baba bahawe uburenganzira.
Urukingo rwa Novavax rukoranye ikoranabuhanga ryigeze kwifashishwa mu myaka yashize ubwo harwanywaga Virusi y’Ibicurane (influenza). Ubu habarurwa miliyoni 27 zitarikingiza muri Amerika.
Nubwo muri Amerika ari bwo bagiye gukoresha Novavax, kugeza ubu inkingo ibihumbi 744 zimaze gutangwa mu bindi bihugu kandi nta kibazo cyagaragayemo. Mu bihugu 40 rukoreshwamo harimo Australia na Canada.
