Korea ya Ruguru yagerageje ibisasu bishya bifite ikoranabuhanga rihambaye

Ibiro Ntaramakuru by’igihugu cya Korea, KCNA, biratangaza ko Koreya ya Ruguru yakoze igerageza ry’intwaro zifite ikoranabuhanga ryo mu rwego rwo hejuru mu gihe ishaka kongera intwaro zayo yongeramo intwaro za electromagnatic, ibisasu bya carbon fibers ndetse n’ubwirinzi bushya bw’ibitero byo mu kirere bugendanwa. Igerageza ryakozwe mu minsi itatu.

Kim Jong-sik, umujenerali wagenzuye igerageza, yavuze ko sisitemu ya electromagnetic na bombe za carbon fiber ari “umutungo udasanzwe” mu bubiko bw’igihugu, ariko atanga ibisobanuro bike ku miterere y’intwaro nshya.

Igisirikare cya Koreya y’Epfo cyatangaje ko cyabonye ibisasu byinshi bya misile byaturutse ku butaka bwa Koreya ya Ruguru. Ibiro Ntaramakuru by’Abongereza bivuga ko ibisasu byagenze ibirometero 240 kugera kuri 700.

Ibisasu bya carbon fiber byagenewe guteza umwijima birekura ibyitwa ‘graphite’ ku bigo bitanga amashyanyarazi bigateza ‘short circuit’. Ni mu gihe intwaro za electromagnetic pulse (EMP) zagenewe guhagarika ibikoresho bya elegitoronike by’igisirikare nka za radar n’indege.

Igerageza ryabaye mu gihe umwuka mubi  wiyongera hagati ya Koreya zombi. Kuri uyu wa Kabiri ushize, Minisitiri w’ububanyi n’amahanga wungirije wungirije, Jang Kum-chol, yavuze ko Koreya y’Epfo ari cyo gihugu cya mbere cy’abanzi bafite.