Amagare: U Rwanda rwatangiranye umudali wa Zahabu muri Shampiyona Nyafurika
Umunyarwandakazi Masengesho Yvonne yahesheje u Rwanda umudali wa mbere wa Zahabu muri Shampiyona Nyafurika y’Amagare iri kubera i Kisumu muri Kenya, nyuma yo kwitwara neza mu gusiganwa n’ibihe mu bakobwa batarengeje imyaka 19.
Masengesho w’imyaka 18 yegukanye umwanya wa mbere mu isiganwa ry’ibilometero 10,2 ryabaye mu gitondo cyo kuri uyu wa Gatatu, tariki ya 21 Ukwakira 2026.
Uyu mukinnyi yakoresheje iminota 15, amasegonda 37 n’ibice 193, agendera ku mpuzandengo y’umuvuduko wa kilometero 39,181 ku isaha.
Masengesho yahigitse Umunyamisiri El Sayed Joudy wabaye uwa kabiri akoresheje iminota 15, amasegonda 40 n’ibice 719, amurusha amasegonda atatu n’ibice 526.
Umunya-Ethiopia Gimbato Rahel yasoreje ku mwanya wa gatatu akoresheje iminota 16, amasegonda umunani n’ibice 730, arushwa na Masengesho amasegonda 31 n’ibice 537.
Iri siganwa ryari ryitabiriwe n’abakinnyi 17 baturutse mu bihugu 12, barimo abo muri Afurika y’Epfo, Algeria, u Burundi, Kenya, Nigeria, Sénégal, Uganda, Lesotho na Namibia.
Intsinzi ya Masengesho yahaye u Rwanda umudali wa Zahabu rugitangira iyi Shampiyona Nyafurika, aho rwitabiriye rufite abakinnyi benshi, 29 mu byiciro bitandukanye.
Mu gusiganwa n’ibihe, buri mukinnyi ahaguruka wenyine agahatanira gukoresha igihe gito kurusha abandi, bitandukanye n’isiganwa ryo mu muhanda risanzwe aho abakinnyi bahagurukira rimwe.
Shampiyona Nyafurika y’Amagare ya 2026 ikomeje kubera i Kisumu, aho nyuma yo gusiganwa n’ibihe hateganyijwe n’andi masiganwa arimo aya ‘Mixed Relay’ ndetse n’ayo mu muhanda mu byiciro by’abato batarengeje imyaka 17 na 19, abatarengeje imyaka 23 n’abakuru.
Ingengabihe y’amasiganwa
Kuri uyu wa Gatatu, tariki ya 21 Ukwakira, ni bwo hakinwa amasiganwa yose yo gusiganwa n’ibihe ku giti cy’umukinnyi, ‘Individual Time Trial’.
Abakobwa batarengeje imyaka 19 ni bo babimburiye abandi Saa Mbiri za mu gitondo ku ntera ya kilometero 10,2, ari na ho Masengesho Yvonne yegukaniye umudali wa Zahabu.
Abahungu batarengeje imyaka 19 bakurikiyeho basiganwa kilometero 20,4.
Andi masiganwa ateganyijwe kuri uyu munsi wa mbere ni ay’abagore batarengeje imyaka 23 n’abakuru, bose basiganwa ibiilometero 20, abagabo batarengeje imyaka 23 n’abakuru ku ntera y’ibilometero 30,6.
Ku wa Kane, tariki ya 22 Ukwakira, mu gitondo hazaba isiganwa rya Mixed Relay [ikipe iba igizwe n’abahungu n’abakobwa] ku ntera y’ibilometero 40,8.
Hazakurikiraho isiganwa ryo mu muhanda ry’abahungu bato [abatarengeje imyaka 17] ku ntera y’ibilometero 58,6, mu gihe abakobwa bazakora intera y’ibilometero 38,2.
Ku wa Gatanu, tariki ya 23 Ukwakira, abakobwa batarengeje imyaka 19 bazasiganwa mu muhanda ku ntera y’ibilometero 68,8 mu gihe abahungu batarengeje imyaka 19 bo bazasiganwa intera y’ibilometero 119,8.
Ku wa Gatandatu, tariki ya 24 Ukwakira, hazaba isiganwa ryo mu muhanda ry’abagore n’abatarengeje imyaka 23, rizatangira ku ntera y’ibilometero 122,2.
Shampiyona Nyafurika izasozwa ku Cyumweru, tariki ya 25 Ukwakira, hakinwa isiganwa ry’abagabo n’abatarengeje imyaka 23 aho bazasiganwa ibilometero 175,2.
