Kapiteni Ibrahim Traoré yashyizeho igihano cy’urupfu

Burkina Faso yagaruye igihano cy’urupfu nyuma y’uko Inteko Ishinga Amategeko itatowe n’abaturage yemeje ivugururwa ry’itegeko rihana ibyaha, nk’uko Minisiteri y’Ubutabera yabitangaje ku wa Kabiri, tariki ya 20 Ukwakira 2026.

Icyo cyemezo gihinduye politiki y’icyo gihugu cyo muri Afurika y’Iburengerazuba, cyari cyarakuyeho igihano cy’urupfu ku byaha bisanzwe mu 2018.

Nk’uko ibitangazamakuru byo muri icyo gihugu bibitangaza, ibyaha bishobora guhanishwa igihano cy’urupfu birimo iterabwoba, ubutasi, kugambanira igihugu, kwica umubyeyi wawe ndetse no kwinjiza mu gihugu ibicuruzwa bibujijwe cyangwa byarengeje igihe, iyo biteje urupfu.

Iri vugurura rije nyuma y’uko Kapiteni Ibrahim Traoré, uyobora Burkina Faso kuva mu 2022 nyuma y’ihirikwa ry’ubutegetsi, yari yatangaje umugambi wo kugarura igihano cy’urupfu mu mwaka ushize.

Icyemezo cyo kugarura igihano cy’urupfu cyakiranwe impungenge n’imiryango iharanira uburenganzira bwa muntu. Umuryango mpuzamahanga wa Amnesty International wari warasabye Guverinoma ya Burkina Faso kutongera gushyiraho icyo gihano.

Abaharanira uburenganzira bwa muntu bakunze kugaragaza ko igihano cy’urupfu gishobora guteza ingaruka zidasubirwaho mu gihe habayeho guhamya umuntu icyaha atakoze, ndetse bagasaba ibihugu gukoresha ibindi bihano bihuje n’amahame yo kurengera ubuzima bwa muntu.

Ikinyamakuru Africanews cyivuga ko umuntu uheruka kwicwa hakurikijwe igihano cy’urupfu muri Burkina Faso yishwe mu 1988. Bivuze ko icyemezo cyo kugarura icyo gihano gifunguye indi paji mu mateka y’ubutabera bw’icyo gihugu, nubwo cyari kimaze imyaka myinshi kidashyirwa mu bikorwa.

Burkina Faso iri mu bihugu bya Afurika biyobowe n’abasirikare, nyuma y’ihirikwa ry’ubutegetsi ryabaye mu 2022.