Israel yaburiye Hamas ko niyongera kuyikora mu jisho izabyicuza
Israel yasabye ingabo zayo kuba maso, iburira Hamas ko niramuka igabye igitero ku basirikare bayo bari muri Gaza, izabiryozwa ku buryo bukomeye.
Iki gihugu cyatanze uwo muburo mu gihe hitegurwa kwibuka ku nshuro ya gatatu ibitero Hamas yagabye muri Israel ku wa 7 Ukwakira 2023.
Minisitiri w’Ingabo wa Israel, Israel Katz, kuri uyu wa Kabiri tariki ya 6 Ukwakira 2026, yategetse ko ingabo z’igihugu cye kuryamira amajanja, nyuma y’amakuru y’ubutasi agaragaza ko Hamas yaba iteganya kugaba ibitero ku ngabo za Israel ziri muri Gaza.
Ibiro bya Katz byatangaje ko uwo mwanzuro wafashwe “hashingiwe ku makuru y’ubutasi agaragaza ko Hamas ishobora kugerageza kugaba ibitero n’ibikorwa by’iterabwoba ku ngabo zacu ziri muri Gaza kuri uwo munsi.”
Israel yaburiye ko mu gihe hari abasirikare bayo bagirirwa nabi, Hamas n’abaturage ba Gaza ari bo bazishyura ikiguzi gikomeye.
Iti “Mu gihe, Imana iturinde, ingabo zacu zagirirwa nabi, abazishyura ikiguzi gikomeye ni Hamas n’abaturage ba Gaza, ku rugero rurenga kure ibyabaye.”
Ibitero Hamas yagabye muri Israel ku wa 7 Ukwakira 2023 byahitanye abantu 1.221, hashingiwe ku mibare ya AFP ishingiye ku yatanzwe n’inzego za Israel.
Muri ibyo bitero, abantu 251 bajyanywe bunyago muri Gaza, barimo 44 bari bamaze gupfa.
Israel yahise itangiza ibikorwa bya gisirikare muri Gaza mu gusubiza icyo gitero. Minisiteri y’Ubuzima muri Gaza ivuga ko ibyo bikorwa bimaze guhitana abantu barenga 74.200, mu gihe igice kinini cy’ako gace cyasenyutse.
Kuva agahenge katangira mu Ukwakira 2025, Minisiteri y’Ubuzima muri Gaza ivuga ko ingabo za Israel zimaze kwica abantu barenga 1.440.
Ku wa Mbere, mu muhango wo kwibuka imyaka itatu ishize ibyo bitero bibaye, Minisitiri w’Intebe wa Israel, Benjamin Netanyahu, yavuze ko Hamas itazongera gutegeka Gaza.
Yashimangiye kandi ko Israel izakomeza guhiga abakekwaho kugira uruhare mu bitero byo ku wa 7 Ukwakira 2023, ndetse n’abagize uruhare mu gufata bugwate abaturage ba Israel.
Ingabo za Israel ziryamiye amajanja muri Gaza