RDC: Abantu bagera kuri 700 bamaze kwicwa na Ebola
Mu byumweru bitatu bishize abantu 100 bamaze kwicwa na Ebola muri Repubulika Iharanira Demokarasi ya Congo (RDC), bituma abamaze kwicwa n’iki cyorezo basaga 700 nk’uko bigaragazwa n’imibare ya Minisiteri y’Ubuzima muri iki gihugu.
Ni ku nshuro ya mbere abaturage b’iki gihugu bari guhabwa inkingo ari benshi aho abagera ku bihumbi 95 bari guhabwa urukingo rwa rVSV-Zebov ruva muri laboratwari za Merck.
Minisiteri y’Ubuzima yavuze ko uru rukingo rwarokoye ubuzima bw’abantu benshi.
The East African yatangaje ko ari ku nshuro ya 10 muri Repubulika Iharanira Demokarasi ya Congo yibasiwe n’icyorezo cya Ebola mu myaka 40 ishize aho muri Kanama umwaka ushize cyabanje gufata muri Kivu y’Amajyaruguru kigakomereza muri Ituri.
Ni ubwa kabiri Ebola ihitanye abantu benshi nyuma y’uko mu 2014, mu Burengerazuba bwa Afurika iki cyorezo kishe abagera ku bihumbi 10 mu bihugu bya Guinea, Liberia na Sierra Leone.
Minisiteri y’Ubuzima yavuze ko “kuva iki cyorezo cyakongera kugaragara, abantu 1.117 ari bo bamaze kugaragaza ibimenyetso bya Ebola, muri bo 1.105, nibo byemejwe ko bayirwaye mu gihe 66 byaketswe”.
“Igiteranyo cy’abamaze guhitanwa na yo ni 702, abo byemejwe ko bishwe na Ebola ni 636, naho abo bikekwa ko ari Ebola yabishe ni 66, abakize iyi ndwara ni 339.”
Iyi minisiteri yakomeje ivuga ko kuri uyu wa Gatanu abandi bagera kuri 295 bagaragaweho Ebola barimo basuzumwa.
Ishami ry’Umuryango w’Abibumbye ryita ku buzima, OMS, ryaburiye abanyagihugu ndetse n’abatuye mu karere RDC, iherereyemo kuko iki cyorezo kiri gukwirakwira ku kigero cyo hejuru.
