Karisimbi Events Yahurije Hamwe Ibyamamare 50 Bihataniye Ibihembo Muri Karisimbi Entertainment Awards 2024
Karisimbi Events Izanye ibirori by’amateka mu ruganda rw’imyidagaduro nyarwanda binyuze muri Karisimbi Entertainment Awards 2024, bikaba byitezweko ibi birori by’icyubahiro bizahuriza hamwe impano zikomeye, ibyamamare muri muzika, cinema, radiyo, televisiyo ndetse n’umuhango wo gutanga ibihembo bizashimangira iterambere ry’uruganda rw’imyidagaduro mu Rwanda.
Mu ijoro ryuzuye ubukaka, Karisimbi Entertainment Awards izaba umwanya w’ikirenga wo guha agaciro imbaraga n’umuhate abahanzi, abakinnyi ba filime, abashoramari n’abandi batandukanye mu guteza imbere imyidagaduro mu Rwanda.
Abahatana muri ibi bihembo bazagenda bagaragazwa mu buryo butangaje, aho abazaryitabira bazishimira akarasisi k’abanyempano, kwigaragaza kudasanzwe, ndetse n’ibindi bitunguranye byateguwe muri iki gikorwa kidasanzwe kizaba tariki ya 31 Mutarama 2025 kuri Atelier de Vin hazwi nko ku Akagera Motors uvuye Rwandex.
Kugira ngo abantu bose bagire amahirwe yo kwitabira ibi birori, amatike yatangiye kugurishwa hakoreshejwe uburyo bwa MoMo. Hakaba Hariho amahitamo atandukanye:
- Itike isanzwe: 15,000 RWF
- VIP: 30,000 RWF (harimo serivisi yihariye n’icyo kunywa cyo kwakirizwa)
- Table y’abantu 6: 250,000 RWF (irimo icupa ry’umuvinyo nk’ishimwe ry’icyubahiro)
Emmanuel Mugisha, Umuyobozi Mukuru wa Karisimbi Events, yashimangiye ko ari ibirori birenze kubindi bibirori bisanzwe, kuko we mumboni ze abona ko ari ijoro ry’igikundiro n’ icyubahiro kubazitabira.
Ati, “Karisimbi Entertainment Awards 2024 ni igihe cyo kuzirikana ubuhanzi, ubwitange, n’icyerekezo bituma uruganda rw’imyidagaduro rwacu rugenda rutera imbere. Twateguye ijoro ridasanzwe, ririmo ibyishimo, amashimwe,kuburyo ntahwema kuvuga ko ariibihe bizahora mu mitima y’abazitabira.”
Ibyiciro Bihatanirwa ndetse n’ abahanzi 50 bazahatanira Ibihembo
Bimwe mu byiciro bihatanirwa harimo icy’abahanzi bitwaye neza mu 2024, ahahatanye abarimo The Ben, Chriss Eazy, Kevin Kade, Bruce Melodie na Element, mu gihe muri cyiciro cy’abahanzikazi hahatanyemo Bwiza, France Mpundu, Ariel Wayz na Marina.
Mu ndirimbo z’umwaka hahatanye eshatu arizo; Plenty ya The Ben, Milele ya Element ndetse na Jugumila ya Chriss Eazy, mu cyiciro cy’utunganya indirimbo mu buryo bw’amajwi hahatanyemo Element, Prince Kiiz, Loader, Real Beat na Kozze.
Mu gihe mu cyiciro cy’utunganya amashusho wahize abandi hahatanyemo Fayzo Pro, Gad, Eazy Cut, Sammy Switch na Bagenzi Bernard.
Uretse umuziki ariko harimo n’ibindi byiciro, nko muri sinema hari icy’umugore ukina filime witwaye neza, hahatanyemo Vanessa Irakoze Alliane wamenyekanye nka Maya muri filime y’uruhererekane kuri Youtube, Tessy uzwi muri Kaliza wa Kalisa, Swalla, Nyambo, Madedeli, Rufonsina, Nana na Lynda Priya.
Mu cyiciro cy’umukinnyi wa filime w’umugabo wahize abandi ho hahatanyemo Niyitegeka Gratien wamamaye nka Papa Sava, Bamenya, Dr Nsabi, Killaman na Clapton Kibonge.
Mu cyiciro cya televiziyo y’imyidagaduro y’umwaka hahatanyemo ISIBO TV, ISHUSHO TV, Goodrich, KC2 na Isango Star, naho mu cyiciro cy’abanyamakuru ba siporo (Sports Commentator of the year) hahatanyemo Rugangura Axel,Hagenimana Benjamin uzwi nka Gicumbi, Fuadi Uwihanganye na Mugenzi Faustin wamenyekanye nka Faustihno.
Niba uri umukunzi w’imyidagaduro, umuhanzi ushishikajwe no kwagura impano yawe, cyangwa se umuntu ukunda kwifatanya n’abandi mu kwizihiza intambwe z’iterambere ry’ abanyarwanda Karisimbi Entertainment Awards 2024 ni igitaramo udakwiye gucikwa.
Umwanditsi: Bertrand Munyazikwiye
