Ibisigaratongo by’Ibiti: Uko Bihinduka Ubugeni, Umutungo n’Ishema ry’Abahanzi b’Abanyarwanda

Mu Rwanda rwo muri iki gihe, ibisigaratongo by’ibiti nk’imizi, ibisigazwa by’ibiti byatemwe, n’ibice by’ibiti byangiritse nk’imyanda idafite akamaro. Ahubwo, byahindutse isoko ikomeye y’ubugeni, iterambere rirambye n’ubukungu bushingiye ku bwenge n’ubuhanzi. Binyuze mu buhanga n’ubuhanga bw’abanyabugeni, ibisigaratongo bisigaye bikorwamo intebe, ameza n’imitako yo mu nzu ifite agaciro gakomeye ku masoko yo mu gihugu no hanze yacyo.

Ibyo bikoresho bikozwe mu bisigaratongo bikundwa cyane kubera imiterere yihariye yabyo. Bitandukanye n’imbaho zisanzwe, ibisigaratongo bifite imirongo, imyenge n’imizi bigoramye biha buri gikorwa isura idasanzwe. Ibi bituma buri ntebe cyangwa ameza biba umwimerere, bikaba igihangano cyihariye kitagira ikindi gihwanye na cyo.

Bimwe mu bikoresho bakora mu bisagaratongo

Munyemana Albert, umunyabugeni utuye i Kimisange,mu karere ka Kicukiro ni umwe mu bagaragaza neza ko ibisigaratongo bishobora guhinduka umutungo n’ishema. Uyu munyabugeni azwi cyane ku buhanga bwe mu guhindura ibisigaratongo by’ibiti mo ibikoresho byiza kandi bikomeye birimo ameza, intebe n’imitako yo kurimbisha inzu. Imirimo ye irangwa n’ubwitonzi, guhuza umuco nyarwanda n’imiterere ya kijyambere, ndetse no kubaha imiterere kamere y’igiti adahinduye cyane umwimerere wacyo.

Munyemana Albert umunyabugeni

Kubera ubugeni akorana ubuhanga n’ubwiza budasanzwe, Munyemana Albert akunze kubona ibihembo byinshi n’ishimwe mu imurikabikorwa ry’ubugeni n’ubukorikori butandukanye. Abasura ibikorwa bye bagaragaza ko ibyo akora bitari ibikoresho byo mu nzu gusa, ahubwo ari ibihangano bifite ubutumwa, bigaragaza ko kurengera ibidukikije bishobora kujyana n’iterambere ry’ubukungu.

Uretse ubugeni, gukoresha ibisigaratongo bifite akamaro kanini ku bidukikije. Bigabanya gutema ibiti bishya, bigafasha mu kurengera amashyamba no kugabanya imyanda. Ibi bihura n’intego z’igihugu zo guteza imbere iterambere rirambye no kubungabunga umutungo kamere.

Abicaye Ku bisigaratongo

Ku rubyiruko n’abandi banyabukorikori, urugero rwa Munyemana Albert rwerekana ko ubugeni bushobora kuba isoko y’akazi n’iterambere. Abenshi baramwigiraho, biga uko bafata ibisigaratongo bikaba igitekerezo cy’ubucuruzi gishingiye ku bwenge, umuco n’ubuhanga.

Nubwo hari imbogamizi zirimo kubona ibikoresho bihagije n’amasoko ahoraho, abahanzi bakora mu bisigaratongo by’ibiti bafite icyizere ko uru rwego ruzakomeza gutera imbere. Ibisigaratongo, byahoze bifatwa nk’imyanda, ubu bihindutse isoko y’ubugeni, ubukungu n’ishema ry’u Rwanda.

By:Florence Uwamaliya