Filime ‘Kwibuka, se souvenir’ ya Sonia Rolland igiye kwerekanwa mu mijyi irindwi y’u Bufaransa
Filime ‘Kwibuka, se souvenir’, ikinwa na Sonia Rolland wabaye Nyampinga w’u Bufaransa mu 2000, igiye kwerekanwa mu mijyi irindwi yo muri icyo gihugu, mbere y’uko isohoka ku mugaragaro ku wa 4 Ugushyingo 2026.
Iyi filime izerekanwa kuva ku wa 26 kugeza ku wa 30 Ukwakira 2026, mu mijyi ya La Baule, La Roche-sur-Yon, Royan, Rochefort, La Rochelle, Lomme na Mâcon, nk’uko bigaragara ku matangazo yamamaza ibi bikorwa.
‘Kwibuka, se souvenir’ yayobowe na Jonas d’Adesky, ikaba imara iminota 92. Ni filime ihuza inkuru y’ubuzima bw’umuntu n’amateka y’u Rwanda, by’umwihariko ingaruka Jenoside yakorewe Abatutsi mu 1994 yasigiye abayirokotse n’imiryango yabo.
Iyi filime ishingiye ku nkuru ya Lia, umukinnyi wa Basketball wabigize umwuga, ufite inkomoko mu Rwanda no mu Bufaransa.
Lia abona amahirwe yo gukinira Ikipe y’Igihugu y’u Rwanda ya Basketball, igiye kwitabira irushanwa nyafurika, bituma asubira mu gihugu yavuyemo afite imyaka icyenda.
Uru rugendo rumusubiza mu mateka y’ubuzima bwe, rukongera kumwibutsa ibihe bikomeye yanyuzemo akiri umwana, yari amaze igihe agerageza kudatekerezaho.
Gusubira mu Rwanda bituma Lia yongera kwibuka amateka ye, akanatekereza ku nkomoko ye, umwirondoro we n’uruhare kwibuka amateka bigira mu buzima bwe.
Sonia Rolland ni we ukina ari Lia muri iyi filime, anahuriramo n’abandi bakinnyi barimo Jean-Hugues Anglade, Parfait Mugiraneza Ntambiyindekwe, Isabelle Kabano, Jean-Henri Compère na Jacques Bahige.
