Pariki y’Akagera yinjije arenga miliyari 2,2 Frw mu mezi atatu, itangira gukurikirana inkura hifashishijwe drone
Pariki y’Igihugu y’Akagera yatangaje ko mu mezi atatu, kuva muri Nyakanga kugeza muri Nzeri 2026, yakiriye ba mukerarugendo 15.790, binjiza amadolari ya Amerika 1.529.682, ahwanye na miliyari 2,257 Frw.
Iyi mibare ikubiye muri raporo y’ibikorwa by’iyi pariki mu gihembwe cya gatatu cya 2026, yashyizwe ahagaragara ku wa Kane, tariki ya 22 Ukwakira 2026.
Muri ba mukerarugendo 15.790 basuye Pariki y’Akagera muri icyo gihe, abagera kuri 13.911 bishyuye amafaranga yo kuyisura.
Raporo igaragaza ko impuzandengo y’amafaranga yinjijwe kuri buri mukerarugendo yazamutse ikagera ku madolari ya Amerika 162, bikaba byariyongereyeho 22% ugereranyije n’umwaka wa 2025. Iri ni ryo zamuka rikomeye ryagaragaye kuva mu 2010.
Muri icyo gihembwe, Pariki y’Akagera yakiriye ibikorwa bitandukanye birimo inama ngarukamwaka ya African Parks, amarushanwa ya Wildlife Ranger Challenge, Akagera Trail Marathon.
Ku bijyanye n’ibikorwa bigamije guteza imbere imibereho y’abaturage, Pariki y’Akagera yatangaje ko gahunda zinyuzwa mu makoperative iteramo inkunga zageze ku bantu 52.958, zitanga inyungu ifite agaciro k’amadolari ya Amerika ibihumbi 416.
Hegitari zirenga ibihumbi 16 zafashwe n’inkongi
Raporo igaragaza ko muri icyo gihembwe, ubuso bwa hegitari 16.631 zo muri Pariki y’Akagera bwibasiwe n’inkongi z’umuriro.
Ubuyobozi bw’iyi pariki bwatangaje ko hafi kimwe cya gatatu cy’izo nkongi cyaturutse ku bikorwa byo gutwika ibice bimwe na bimwe by’ishyamba mu buryo bugenzurwa, hagamijwe gucunga neza urusobe rw’ibinyabuzima no gukora imirongo ibuza umuriro gukwirakwira.
Izindi nkongi zatewe n’impanuka zituruka ku baturage baturiye pariki, ndetse n’imiriro ifitanye isano n’ibikorwa by’abantu bahiga inyamaswa mu buryo bunyuranyije n’amategeko.
Ku rundi ruhande, Pariki y’Akagera yatangaje ko ibikorwa by’ubworozi bw’amafi bikomeje kugira uruhare mu kuzamura imibereho y’abaturage, by’umwihariko abibumbiye mu makoperative y’uburobyi.
Muri Nyakanga 2026, Akagera Management Company yongereye amafi akiri mato yo mu bwoko bwa tilapia ibihumbi 50 mu cyuzi cya Gacaca Valley Dam, gifite ubuso bwa hegitari enye, giherereye mu Murenge wa Murundi.
Muri Kanama, Koperative ya Mubari na yo yongereye amafi akiri mato ibihumbi 23 mu cyuzi gihangano kizwi nk’icya Musenyeri.
Inzovu zikomeje gukurikiranwa hifashishijwe GPS
Ubushakashatsi bwakorewe ku nzovu zo muri Pariki y’Akagera bwagaragaje ko inzovu 55 zibarizwa mu matsinda abiri afitanye isano ya hafi.
Muri icyo gihembwe, izindi nzovu eshatu zashyizweho ibikoresho bya GPS bifasha kumenya aho ziherereye no gukurikirana ingendo zazo.
Ibyo byatumye umubare w’inzovu zimaze kumenyekana no gushyirwa mu buryo bwo gukurikiranwa ugera ku 121, zingana na 85,2% by’inzovu zose zizwi muri iyi pariki.
Ibi bikoresho bya GPS bifasha inzobere gukurikirana inzovu mu gihe kirekire, gusuzuma ingendo zazo no kumenya uko umubare wazo n’imibereho yazo bigenda bihinduka.
Inkura zatangiye gukurikiranwa hifashishijwe drone
Pariki y’Akagera yatangaje ko amakipe ashinzwe gukurikirana inkura akomeje kuzikurikirana buri munsi, haba n’amaguru ndetse no mu kirere.
Muri icyo gihembwe, inkura z’umweru zagaragaye inshuro 2.517, mu gihe iz’umukara zagaragaye inshuro 413.
Ubuyobozi bw’iyi pariki bwatangaje ko, nyuma yo kubona impushya zikenewe, abakozi bashinzwe gukurikirana inkura batangiye amahugurwa ngiro y’ibyumweru bitatu ajyanye no gukoresha indege nto zitagira abapilote zizwi nka drone.
Aya mahugurwa agamije kongera ubushobozi bwo gukurikirana izi nyamaswa no kurushaho kuzicungira umutekano.
Pariki y’Igihugu y’Akagera yashinzwe mu 1934, ikaba ifite ubuso bwa kilometero kare 1.122. Ibarizwamo inyamaswa zirenga 11.300, zirimo intare 60, inzovu 142, imbogo 4.000, twiga 115, ingwe ziri hagati ya 80 na 100 ndetse n’inkura 145.
Harimo kandi imparage 2.000, impara 1.500, impyisi ziri hagati ya 120 na 150, imvubu ziri hagati ya 1.500 na 1.800, inyemera 1.000 n’indonyi zirenga 1.000. Iyi pariki inabarizwamo amoko 179 y’ibinyugunyugu.
Pariki y’Akagera ifite amoko y’inyoni agera kuri 500, ikaba ari yo iza ku isonga mu Rwanda mu kugira amoko menshi y’inyoni. Pariki ya Nyungwe ifite amoko agera kuri 300, mu gihe Pariki ya Gishwati-Mukura n’iy’Ibirunga zifite amoko ari munsi y’uwo mubare.
